十三間擺到明要搞「港獨」嘅大專院校學生會，尋日發咗個好好笑嘅所謂「聲明」出嚟，呢篇聲明係用「半口語、半書面語」去寫，目的可能係想強調自己香港人身份，所以用廣東話去寫啩。嗱，呢篇聲明寫成點呢，囍雨就唔評論喇，至於篇聲明嘅主旨同內容呢，明顯就有好大斟酌嘅餘地，呢班後生仔唔再掩飾自己搞緊「港獨」，足證「港獨」思潮喺大專院校部份所謂學生領袖裡面，其實已經呈現失控狀態，香港各界，包括部份傳媒，唔通真係仲要包庇、淡化同美化呢班人嘅惡行？

聲明措辭過份兼離譜

篇聲明內容有幾OVER呢，唔使講太多，只係QUOTE幾個例子出嚟已經夠用。呢班「港獨」份子話喎，香港二十年嘅七月一號再度「淪陷」、又話香港已經淪為中國殖民地，又話新移民係人口殖民，仲話中央政府對香港嚟講係「外侮」添！整篇聲明，一而再、再而三咁將​「香港」同「中國」區分，嘗試將「回歸」演繹成為「再殖民」，甚至將中央政府視為「敵國」，稱之為「外侮」，係囉，咪就係搞「港獨」囉，篇聲明冇「港獨」兩個字，唔代表唔係「港獨」囉。

查實道理就好簡單，只要全社會都確立咗呢十三間院校嘅學生代表係搞緊「港獨」的話，咁唔該，非建制派人士唔好再將佢哋言行視為「言論自由」或者「學術自由」，佢哋而家唔係「討論港獨」問題，更加唔係「研究港獨」問題，佢哋係不折不扣咁「搞港獨」，至少都係「宣傳、煽動、鼓吹、鼓動」身邊嘅人同學生去支持「港獨」、參與分裂國家行為，呢啲已經大大超出「言論自由」範圍啦，唔係咁都要拗呀？

社會必須制止「港獨」蔓延

囍雨呢篇文，並唔係要逐點去駁斥呢班學生領袖嘅謬論，而家係提醒所有會睇呢篇文章嘅讀者，香港各大專院校嘅學生，到底搞緊乜嘢。大學，係社會風潮嘅發源地，作為香港市民，如果發現大學學界裡面出現歪風邪說，咁作為社會一份子，出聲提點，甚至係公開批評，其實都係正常不過。喂，提醒社會注意咋喎，咁都有錯？搞港獨喎！暴力喎！流血喎！係明顯嘅犯罪行為喎，大家真係要盲目縱容？唔係啩？

講到呢度，囍雨突然諗起特首梁振英前年喺施政報告，點名希望社會關注大專學界出現「港獨」思潮，梁振英作為「吹哨人」善意提醒，點知事後畀人老屈，話如果唔係因為佢點名批評，「港獨」思潮亦唔會發酵云云。善意提醒，今時今日都會被人演繹成罪行嘅始作俑者，你話香港唔係病咗都冇人信。好啦，而家足足有十三間大專院校學生會要搞「港獨」喇，大家到底知道有幾嚴重未呀？

政客別再包庇「港獨」

顧左右而言他，刻意淡化「港獨」嚴重性，甚至話「港獨」只係偽命題，唔值得關心等等，種種類似說法，無非係要掩飾「港獨」惡行嘅嚴重性，老土啲都要講句，大家呢一刻唔出聲，唔通真係要等到呢班後生仔走上街頭、流血收場，大家先肯叫佢停？如果呢一刻唔盡快阻止「港獨」思潮萌芽發酵，唔通真要等出大事先嚟阻止？

最後，囍雨好想點呢十三間搞「港獨」嘅大專院校學生會名，等各位社會人士同家長都知道，到底我哋珍而重之、連鬧一句都唔敢嘅「好學生」到底做緊乜。呢十三間大專院校學生會分別係：香港城巿大學學生會、恒生管理學院學生會、香港浸會大學學生會、香港科技大學學生會、嶺南大學學生會、香港珠海學院學生會、香港高等教育科技學院學生會、香港教育大學學生會、香港演藝學院學生會、香港大學學生會、香港公開大學學生會、香港樹仁大學學生會、香港中文大學學生會。

圖片來源：HKUSU FACEBOOK