前幾日政府公布新一屆行政會議成員名單，已退黨保平安的公民黨前立法會議員、民主思路召集人湯家驊被邀成為其中一員。本來有民主派人士加入行政會議，對於行會組成或者討論政策都有一定幫助，不過喺呢個動輒得咎嘅時代，政治人物有時真係「躺着也中槍」；湯家驊就畀曾經被視為佢接班人嘅公民黨黨魁楊岳橋炮轟，話湯家驊「唔能夠代表民主派」喎。囍雨覺得好奇怪，乜民主派有「獨家代理」嘅咩，所謂民主派嘅政治光譜都好闊，楊岳橋可以唔畀其他人做民主派咁惡架？

溝通派不等於建制派

先聽聽湯家驊自己點講先。湯家驊回應楊岳橋言論時不慍不火、有理有節咁回應，話自己過去十幾年政治經歷，足以顯示自己係民主派，唔駛其他人批准！講得真係好，囍雨認為，湯家驊要走傳統民主派以外嘅路線，唔等於佢唔再係民主派。其實湯家驊講得有理有節架喎，佢話喺行會向政府反映民主派希望重啟政改嘅意見，又點出重啟政改要由改善彼此關係做起，令政府同民主派進一步了解對方，互相包容，然後再嘗試討論人大8.31框架可以改動幾多，而最低嘅共通點要係符合「一國兩制」同《基本法》，討論過程亦要各讓一步。

反覆思量湯家驊嘅言論，如果真係要為湯家驊嘅政治立場下一個定義，應該係一個肯溝通嘅民主派，而絕對唔係好似楊岳橋佢哋咁，從頭到尾、徹頭徹尾只係識反對嘅「盲反」民主派。相比起楊岳橋，囍雨真心認為湯家驊嘅政治手腕高好多，政治從來都唔係一言不合就一拍兩散嘅細路仔遊戲，有時要先溝通，有時要退一步，有時就要堅持；楊岳橋佢哋一直「盲反」政府，佢哋到頭來為市民爭取過啲乜，幾乎係乜都冇！

民主非霸道、排斥

楊岳橋果種「唯我獨尊」、「民主只此一家」嘅說法，老實講，根本就係同「民主」二字背道而馳，係霸權主義式民主！其實冇人可以話只有自己先代表所有民主派，但同理，冇人，包括公民黨同楊岳橋，同樣唔可以代表「民主」呢兩個字去否定其他人做民主派！

民主派一直以嚟嘅任務，就係要喺香港爭取民主，囍雨同意湯家驊嘅說法，溝通係最大前提，試問如果事事對抗甚至用違法手段威脅政府，又點會成功呢？如果楊岳橋呢班民主派唔肯傾又企硬要公民提名，甚至無視民意繼續喺未來反政改，可以話佢哋根本唔係民主派，而只係拖延民主進程、香港發展嘅「搞事派」呢？

原圖：Takungpao