噚日城市論壇特登用「新政府管治班子」做討論主題，囍雨見到前中央政策組全職顧問劉細良洋洋得意咁串林鄭班子，話林鄭嘅「無驚喜，即係無驚嚇」就好似餐廳老闆話「啲嘢唔難食照幫襯啦」，以一副好有見地嘅姿態品評新班子，話佢舊人多於新人，質疑點做出「管治新風格」，點解決香港咁多嘅矛盾喎？劉細良串人串得咁興奮，但係囍雨記得好清楚，上屆政府佢係中策組一份子，仲周圍講佢係特首嘅頭號智囊，咁點解果陣時，佢又無提出點解決香港嘅深層次矛盾呢？

社會矛盾梁班子上任前已存在

根據劉細良嘅講法，佢話過去幾年政治環境扭曲，市民已經冇期望，仲話梁班子逆民意，令社會撕裂，所以冇人願意加入政府。囍雨對於劉細良呢種所有嘢入晒「政府數」嘅說法，真係不敢苟同，過去幾年政治環境扭曲，真係政府一手造成？其他人完全無責任？現屆政府之所以喺施政上咁進取，有時甚至不惜觸碰既得利益者，係因為有好多積壓已久嘅社會問題仲未解決，尤其係房屋同貧窮問題，喺梁振英班子未上任前已存在喇，劉細良作為前一屆政府中央政策組全職顧問，你有「做好呢份工」嗎？竟然仲好意思「講呢啲」，唔係呀嘛？

囍雨本來都唔想數落人，但真係要問下劉細良，喺佢做中策組全職顧問嘅任內，有冇份反對復健居屋？係咪都唔承認香港有貧窮問題？批評現屆政府當然容易，但劉細良既然咁識得公共行政、咁識得政治，佢任內又做過咩好事出嚟呢？最令人覺得諷刺嘅，係劉細良仲敢講呢幾年樓價屢創新高，梗係啦，呢屆政府前有一段長時間都只係得好少土地供應，剩係追落後都追到氣咳啦，樓價想唔高都難囉！

仲有，話政府撕裂社會，呢個講法一樣唔公道，劉細良係咪真心認為政府「一隻手」就可以撕裂社會呢？非建制派一直全力「反政府」，反政改、搞「佔中」、搞旺角暴動、搞「自決」、搞「港獨」等等，乜非建制派冇撕裂社會咩？冇人願意加入政府，其實好正常，因為非建制派班人有事冇事就喺議會內外「審判」啲官員，有時連官員屋企人都唔放過，囍雨就見過唔少咒罵官人屋企人「去死」嘅言論，所謂「禍不及妻兒」，原來喺香港做官會畀人搞屋企人喎！畀你班非建制派咁玩法，有幾多人仲敢加入呢個「熱廚房」呢？

非建制派才是黨同伐異

當劉細良批評政府黨同伐異、用人唯親嘅時候，真係差啲噴飯；只要客觀地睇下呢幾年政治圈發生咩事，就知道黨同伐異嘅係非建制派！不斷標籤行會成員等係建制派，不斷話新政府做唔到「管治新風格」，但唔該劉細良睇下今屆問責班子、行會成員組成，除咗部分舊有班底，既有民主派人士，更有嚟自唔同範疇、一向唔係用政治光譜嚟定義嘅社會人士，到底係邊個黨同伐異，想新政府未上任就畀人「打殘」呢？係咪只要唔係非建制派人士，就一定做唔到嘢？如果一定要用黨同伐異嚟形容政界人士，非建制派呢種唔同政治光譜就係敵人嘅說法，先至係黨同伐異。

就如傳聞會做教育局副局長嘅教聯會副會長蔡若蓮，係咪真係就任都未確定，已經畀非建制派抽出嚟網上欺凌，仲搞咩聯署反對佢出任副局長，咁樣「非我族類」，誓必窮追猛打嘅態度同行徑，唔係黨同伐異咩？

囍雨唔知道點解劉細良喺走出政府之後就咁努力批評現屆甚至來屆政府，不過劉細良咁「正義」，不如教下自己陣營班朋友先啦！

原圖：RTHK