早排一班音樂會搞手，疑似明知自己邀請嘅外國樂隊冇合適簽證，繼續容許樂隊喺自己經營嘅場地舉行收費音樂會，結果被入境處檢控。音樂會嘅搞手違法在先，事後仲大聲夾惡鬧政府打壓佢哋生存空間，但就提都唔提自己疑似靠黑工牟利嘅事實，手法同今日班非建制政客如出一轍！以為件事告一段落，誰不知嗰個民主黨「超級區議員」鄺俊宇尋日又撲出嚟為件事「抱不平」，喺立法會提出「質詢」。結果？梗係畀官員K.O.到一棟都冇啦！

公眾安全是執法唯一考慮

鄺俊宇喺質詢時話喎，唔少文藝團體指出，對包括外國樂隊表演活動在內嘅違規行為採取嚴厲嘅「執管」行動，同善用工廈嘅政策背道而馳，於是佢就用自己立法會議員身份，趁立法會會議嘅機會去提出質詢，要求政府改善。

囍雨之前已經寫過，政府之所以唔容許呢個音樂會搞手喺佢哋個場地搞音樂會，全因佢哋個場地根本唔符合消防要求，換而言之，佢哋個場地根本唔適合搞嗰啲有大量觀眾聚集嘅活動，否則一旦不幸出意外，好容易就會造成大量人命傷亡。呢個道理咁簡單，就算音樂會搞手唔明，鄺俊宇作為立法會議員都冇理由唔明吖？

檢控黑工純粹是依法執法

其實，有一點鄺俊宇可能真係未搞清楚，入境處當日檢控嗰隊冇持合適簽證來到香港，並且從事商業行為嘅樂隊（重申一次，個音樂會係收費同牟利嘅），原因完全係因為樂隊成員係以「旅客」身份入境，身為「旅客」，入境後唔可以喺香港工作，呢個真係「常識」啦，唔係咁都要拗呀？

仲有，鄺俊宇口中嘅「善用現有工廈空間，囍雨相信佢講緊嘅係政府「活化工廈政策」，咁想請問鄺俊宇一聲，佢知唔知「活化工廈政策」係咩先？睇佢個樣都係唔識架喇，就等囍雨點精佢啦；「活化工廈政策」，前提仍然係「公眾安全」，喺符合「公眾安全」大前提下，政府會放寬個別工廈嘅用途限制，記住，係成幢一齊放寬，唔係個別單位，更加唔會為咗音樂會搞手可以賺錢而放寬佢個單位！

放寬工廈做STUDIO 唔代表可以搞音樂會

另外，政府其實早於2001年起已經擴大「工業」地帶內嘅准許用途，真真正正嘅STUDIO，即係好似音樂創作、影音攝錄室、設計及媒體創作室等等，全部都已經獲得豁免，基本上都可以喺工廈裡面經營，唯一條件係唔可以涉及直接向顧客提供服務或供應貨品。

大家睇到啦，STUDIO，係一早容許嘅，但搞音樂會喇喎，好明顯完全係兩回事啦！STUDIO斷估都唔會同一時間聚集上百個樂迷，一齊聞歌起舞、隨音樂擺動身體呀？鄺俊宇要為他人抱不平，到底佢搞清楚道理喺邊處未先？為咗唔想出意外、怕一旦工廈發生火警，會造成嚴重傷亡，唔容許搞手喺唔合規格嘅工廈搞音樂會，到底有咩問題先？如果鄺俊宇係覺得音樂會場地唔足夠嘅，麻煩佢勸一勸自己班非建制派同路人，唔好再喺立法會「拉布」阻撓政府落實擴展土地嘅計劃啦！

圖片來源：The Score Magazine、香港電台即時新聞