候任特首林鄭月娥日前接受訪問，話政府未來要做好教育工作，向社會說明「港獨」危害性，尤其要杜絕「港獨」對少年兒童嘅侵害，喺幼兒階段就應該培養「我係中國人」嘅概念。候任特首講呢啲，其實好正常，因為特首捍衛《基本法》、「一國兩制」根本係憲法制任，《基本法》早有規定，偏偏有啲人係都要拎嚟大造文章，屈林太要搞「變奏版國民教育」，呢個係邊個？咪就係好忙咁飛去美國、台灣同日本去叫人干預香港事務、積極搞「變奏版自決」甚至「港獨」嘅政黨「香港眾志」同佢個秘書長黃之鋒囉！

抹黑政府成癮 黃之鋒無藥可救

黃之鋒今朝喺電台節目實牙實齒，話擔心幼稚園已經有「變奏版國民教育」，仲話做國民小先鋒帶紅領巾唔可以接受喎；講到咁激，連節目主持都忍唔住糾正佢，話林太嘅講法係由小培養「我係中國人」概念，冇講過咩紅領巾咁話。

點解黃之鋒要講到咁誇張？唔通因為「食過番尋味」？2012年嘅「國教風波」，黃之鋒有份一手炒熱，「唱紅抹黑」國民教育，而話人「洗腦」幾乎成為佢嘅口頭蟬！結果，呢啲危言聳聽言論，加上個別傳媒不斷渲染，加埋政客大聲叫囂，終於令到部份家長信以為真，對國民教育產生恐懼；講真，而家諗返轉頭，以香港咁開放同資訊自由，真係會出現黃之鋒所講嘅「洗腦」咩？冇可能囉。

「國教風波」後，輪到港大法律學者戴耀廷提出「佔領中環」，當時有班人經常行出嚟呼應，而黃之鋒就係其中嘅一個；「違法佔領」爆發後，喺2014年9月26日夜晚，本來叫學生到金鐘罷課嘅黃之鋒，突然之間叫啲學生衝入政府總部東翼前地，間接引發之後兩日正式開始嘅「違法佔領」，搞到香港有近80日時間經濟、民生以至市民生活大受影響。而真正誤導人嘅黃之鋒等人，到咗要找數之時，咪又係死不認錯，打官司打到底！

搞完違佔 又想搞「港獨」？

黃之鋒之林太冇講過嘅內容，夾硬塞入林太把口裡面，本身已經係好卑劣嘅行為，不過香港眾志最過份嘅地方，就係一直拒絕同「港獨」撇清關係，甚至講明「港獨」係香港選項之一咁話；黃之鋒同「香港眾志」主席羅冠聰搞「自決」，更離譜係同「台獨」勢力合流，支持由十八個台獨立場清晰嘅台灣立法委員所組成嘅「台獨」組織「台灣國會關注香港民主連線」，更加聯同另外幾個立法會議員同呢個組織「真連線」，齊齊「關注」香港，種種跡象都顯示，「香港眾志」支持分裂國家，已經去到明目張膽嘅地步。

黃之鋒自己搞「港獨」（佢口中係「自決」），但就死口唔認，而家仲反過來將認識國家標籤化做「變奏版國民教育」，呢啲咪「假自決，真港獨」囉！相比起來，林太要求正正常常教中史，明顯就正路兼公開透明得多，而家將教中史或者其他教育工作演繹為「變奏版國民教育」，唔通係想掩飾「香港眾志」搞「變奏版港獨」呢個事實？

圖片來源：大公報