不斷播「獨」、曾多次提出要「武力革命」嘅香港民族黨召集人陳浩天，宣布將會喺今個月30日喺尖沙咀舉行「悼念香港淪陷20年」集會，聲稱要「團結支持港獨嘅朋友」，向國際表達香港依然係中國嘅「殖民地」，預計有300人出席集會。對於警方會唔會批准陳浩天搞集會，或者集會最後會唔會變成「小貓三四隻」嘅圍威喂活動，囍雨唔清楚，但囍雨認為大家千祈唔好對呢啲行為掉以輕心，因為陳浩天一直喺學校播「獨」，如果搞起事上嚟，隨時會推啲青年出嚟做「死士」。

陳浩天擺明「搞局」

陳浩天選擇喺6月30日、即係香港回歸祖國20周年前夕搞「港獨」集會，原因恐怕只有一個，就係襯各界慶回歸嘅時候，搞個集會出嚟令到特區政府甚至中央尷尬，而自己又可以借集會提高人氣，為已經沉寂多時嘅「港獨」派造勢。雖然集會最後變成點就冇人知，但囍雨就覺得市民尤其係青年都唔應該參與，因為有法律界人士指出，陳浩天擺明車馬要集會宣揚「港獨」，可能已經觸犯叛逆罪、煽動罪等刑事罪行，同佢玩埋一份真係好危險；而且呢啲所謂集會去到尾段，有時「唔知點解」變咗搞事、堵路嘅抗爭，啲主事者通常仲會閃咗去，留低啲後生仔喺現場等警察拘捕。

對於陳浩天等「港獨」派又再出嚟「搞局」，囍雨認為必須要小心應對；有別於梁頌恆、游蕙禎，陳浩天喺宣揚「港獨」嘅時候，特別「著力」喺荼毒青年嘅工作，亦曾經推行所謂的「政治啟蒙計劃」，喺中學生層面宣揚港獨。

曾煽動學生加入「港獨」派

喺上年9月嘅開學期間，陳浩天就喺啲中學外面派發「港獨」單張，仲聲稱約有80間中學參加民族黨嘅「中學政治啟蒙計劃」，而陳浩天就向呢啲中學提供「港獨」宣傳資料，仲揚言學生係香港未來，所以佢哋十分重視喺學校嘅「宣傳」。當時，就有中學校長痛斥陳浩天向青年埋手唔道德，有關事件仲引發學校應唔應該討論「港獨」嘅爭議。

今日陳浩天呼籲群眾集會，除咗參加佢嘅集會有風險，大家都應該以舊年農曆新年發生嘅旺角暴動為戒，當時就係本土民主前線嘅黃台仰同梁天琦煽動一班年青人出嚟搞事，甚至係襲擊警察，最後有成90人被捕，至今已經有幾個青年被判入獄，當中仲有被告被重判入獄4月9個月。而黃台仰呢？梁天琦呢？人去了哪裡？梁天琦避走到英國了？「港獨」問題唔單止係政治主張咁簡單，而係鼓吹「港獨」嘅人會煽動青年抗爭、違法，啲政客喺賺取政治本錢嘅同時，聽佢哋「老點」嘅青年往往要「墊屍底」！

原圖：Takungpao