現屆政府任期將滿，大小媒體陸續幫特首梁振英政府「埋單計數」，盤點一下呢五年嘅成績。唔少政界中人、媒體都大讚梁振英任內喺土地房屋政策上做到嘢，未來四、五年公私樓供應大幅增加，政府亦積極發展土地，以應付未來需要。不過，喺一個「逢政府必反」嘅社會，個別有政治目的嘅媒體嘅說法當然相反！囍雨呢幾日就睇到其中一個極奇怪嘅說法，就係話力推多項辣招嘅梁振英谷起樓市泡沫！吓，唔係聽錯呀？囍雨真心好想問，乜呢啲所謂媒體，真係唔知咩人炒起個市咩？

炒客「谷起」樓市？

坊間就有一種說法，話政府嘅樓市辣招會減少樓市二手成交，從而令樓價更加高企，或者買家湧向一手樓等等；不過，呢種說法來自邊度多呢？多數都係地產從業員會咁講，一般市民都覺得如果無辣招，炒風肯定更加熾熱，因為如果無限制、無額外印花稅或者外地買家任意入市，樓市肯定仲癲！

睇返資料，推出樓市辣招後，非本地買家明顯減少，交易總數大約只佔住宅物業交易1.8% - 2.5%，遠低於2012年1月至10月（即引入買家印花稅前）嘅4.5%！不過咁，雖然辣招奏效，但囍雨身邊唔少朋友都講，雖然非本地買家係少咗好多，但而家想入市，仍然要過本地炒家同大客嗰一關，因為呢兩批人已經壟斷咗相當部分嘅一手市場喇。

新盤現場炒家多於用家

喺度先同大家講個小故事。話說囍雨有個朋友早排去睇個位於荃灣有海景嘅新盤，諗住「入張飛」睇下可唔可以抽中樓「上車」，點知去到現場發現除咗見到唔少同自己一樣揸住少少首期想買個細單位嘅年輕夫婦外，竟然有唔少貌似上晒岸嘅中年老人帶埋年輕一代去「抽樓」，疑似畀啲成年冇幾耐嘅年青人幫手買樓避加辣印花稅。更加重要嘅係，呢類新樓盤規定，買「一個單位以上」嘅人優先抽樓，至於買得一個單位嘅買家，就好似朋友同另外兩對年輕專業人士夫婦咁，等到你抽到去揀樓時，都已經冇晒貨。一手買入幾個單位嘅人，有幾多係真正用家？或者有即時居住嘅需要？用家反而係望門輕嘆囉！所以話呢，香港樓，咪就係畀香港人炒起之嘛。

樓價高企源於供應不足

事實上，除咗炒樓，樓價之所以屢創新高，除咗因為資金傾向流入樓市之外，最主要原因都係因為土地、房屋供應唔足夠。有智庫指出，近10年土地開發較之前果10年少咗近90%，政府由1995年至2004年開發咗約7,800公頃土地，但由2005年至2014年大約只係開發咗1,100公頃土地。現屆政府接手嘅時候幾乎冇乜新土地可言，香港對上一個新市鎮已經係90年代發展起嚟嘅東涌。喺缺乏新土地供應嘅情況下，到底係辣招谷起樓市，定係因為土地供應問題，事實其實好清楚。

再者，現屆政府上任之後除咗積極推出辣招，又積極增加房屋土地供應，未來3至4年私樓供應有成96,000個單位，公營房屋喺未來5年亦有94,600個單位；土地供應方面，據報短、中、長期供應嘅土地可以興建超過60萬個住宅單位。將樓價升同政府辣招直接拉上等號，說法既唔準確，亦完全抹煞咗政府嘅努力！

喺政府推出唔同辣招後，無論係短期轉售、外地買家入市嘅數字都大量減少，囍雨唔知道有人借辣招攻擊政府係純粹反政府抑或想樓市「減辣」，但囍雨作為未「上車」嘅青年，真心認為土地房屋供應問題一日未解決，都千萬唔可以「減辣」，因為想流入樓市嘅資金實在太多，辣招就算唔係靈丹妙藥，都起碼有暫時「止咳」嘅作用吖。

原圖：Takungpao