早前被正式落案起訴「公眾妨擾罪」嘅佔領九疑犯，尋日喺區域法院提堂，不過「九疑犯」對於係唔係「俯首認罪」仍然採取拖字訣，死都唔肯答實係唔係會履行承諾「完善法治」。其中，「違法佔領」始作俑者之一嘅陳健民藉口多多，一時話文件未收齊、一時又話要考慮認罪的話，會唔會影響港人言論或者集會自由等等，總之就係顧左右而言他，唔肯找數啦！仲有說好的「佔領數簿」，到今日仲係影都未見，莫非想拖到大家唔記得，之後逃之夭夭？

反口覆舌仲想眾籌

更離譜嘅係，陳健民竟然公開話，由於未來預計會係漫長嘅「司法抗爭」，涉及好多律師，故計劃「眾籌律師費」。嘩，呢吓真係忍唔住要爆喇，講真吖，九疑犯得個「吹」字，最後唔肯俯首認罪，呢個絕大部份理智嘅香港市民都已經預咗，即使呢一刻真係發生，大家都唔會太大反應，因為大家都知，呢班人口中嘅「公民抗命」，但結果呢？有冇如佢哋當初所講，俯首認罪、完善法治先？冇囉！咁我哋嘅法治畀人破壞晒，點解冇人要負責？

但而家講到要「眾籌」喎，咁就唔同講法喇！陳健民講得出做唔到，大家有眼見啦，發起79日「違法佔領」時就係威係勢，一時又剷光頭扮決志、一時又淚流滿面爭取市民支持，但當叫佢認罪呢？藉口多多，講到尾就係唔想負責任！香港部份主要幹道被人無啦啦「佔領」咗79日，條數點解唔使找？當初你呃咁多人出嚟，講到大義凜然咁，而家點解唔使同市民交代？拎住個博士學位嘅陳健民呀，你點都要畀個說法香港市民囉！

呢班人仲未交代佔領「數簿」

仲有，講到眾籌就仲好笑。喺度真係要再一次問問陳健民：「你哋幾時公開違法佔領本數簿？到底違法佔領期間，你哋收咗幾多捐款？收咗邊個捐款？仲有幾多錢剩？」喂，「違法佔領」發生到而家都接近一千日啦，一千日都交唔到本數簿出嚟？你搵乜嘢會計師去做呀？舊數未清，新債免問，今次又想博大霧？

仲有呀，呢班人之前其實都有幫嗰個涉嫌違法《基本法》同《宣誓及聲明條例》嘅劉小麗籌款打官司，後來呢？後來又冇再咗件事囉，籌到幾多？用咗幾多？唔知架，呢班人都唔興交代嘅！

仲要甘心畀陳健民利用？

睇到呢度，陳健民係咩人，相信香港市民心中有數。講到尾，佔領「九疑犯」最終若然唔認罪，即係代表出賣咗全香港七萬幾萬市民，失德、失行、失節，全無誠信可言。整場「違法佔領」，都不知幾多香港人因為呢班人嘅糜糜之音而走上違法之路，甚至前途盡毀，仲直接引發之後「鳩嗚」、暴力光復同旺角暴動等亂象，今日佢哋完美演繹咩叫「講得出做唔到」，香港人，大家真係仲要信佢哋？乜仲害大家唔夠咩？

圖片來源：文匯報