呢個世界就係咁，有啲人對於走到其他國家，積極去「唱衰」自己祖國樂此不疲，就以「香港眾志」呢個政黨為例，要員黃之鋒、羅冠聰同周庭等等，近日先後走去唔同國家或者地區「唱衰」中國同香港，包括美國、台灣同日本等等。之所以話佢哋「唱衰」，可以話係其來有自，皆因呢班人對住外國政客永遠「講啲唔講啲」，一面倒負面之餘，永遠只講同自己立場相近或者係對自己有利嘅內容，咁仲唔係「唱衰」香港？

四出「唱衰」香港內容片面偏頗

對於黃之鋒等人以往走到外國政客面對點評香港時政，甚至要求外國政治勢力介入香港事務，呢啲咁惡質嘅行為囍雨都唔想再重複；最近幾日之嘛，黃之鋒又同埋香港眾志嗰個周庭走咗去日本，除咗接受日本傳媒訪問外，仲走去日本同日本嘅大學生「分享」添。

都係嗰句啦，如果你班人去到外地所講嘅內容夠全面，咁其實又冇人會批評你哋嘅，但若然聽眾聽你哋講嘢，原來只係聽到片面內容同訊息，咁就唔同講法喇。黃之鋒同周庭去日本講咩呢？據聞佢兩個主要係講「違法佔領」，其中黃之鋒就話，自己一直堅持非暴力原則、又話「違法佔領」之所以失控，係因為有人「收錢清場」等等。

只講有利自己內容黃之鋒斷章取義

黃之鋒「講咗」嘅內容有幾多係真，喺度留畀讀者自行判斷，但佢「冇講」嘅部份有幾多，明顯就更值得社會注意喇。大家唔會唔記得，「違法佔領」期間，示威者唔畀警車送飯入境政府總部畀警察，要由佢哋檢查先放行；大家唔會唔記得，數百名暴徒喺龍和道包圍三個警察「搶犯」；大家唔會唔記得，有示威者喺金鐘港鐵站附近襲擊休班警員，令到佢要送院救治！

仲有仲有，大家又記唔記得，暴徒自製盾牌及武器、準備咗大量玻璃樽同警方對峙，甚至襲擊警察；大家又記唔記得，暴徒自製有大型尖刺嘅障礙物，意圖阻止警方清場？另外，最過份嘅係，數以十萬計「違法佔領」參加者，刻意刑事藐視法庭，對法庭嘅禁制令置若罔聞，拒絕撤走，破壞香港法治、視法庭如無物，試問黃之鋒，佢到底有冇同班日文學生交代呢啲情況呀？非暴力？非暴力會「搶犯」？會用武器襲警？

名副其實「唱衰」香港

所以話，「香港眾志」一干人等「唱衰」香港並唔係無的放矢，片面、斷章取義、曲解「違法佔領」、將暴力責任一面倒歸咎於國家同特區政府，呢啲係「公道」咩？係全面反映事實咩？講到尾，批評「香港眾志」同黃之鋒係「唱衰」香港，真係一啲都冇講錯架！

圖片來源：黃之鋒FB截圖