成日有人話，政客總係「綿內有針」，佢哋口同你講一套，做就另一套，心入面諗緊嘅可能又係另一套。好似熱血公民鄭松泰咁，成日以本土派嘅面目示人，原來佢覺得自己唔係本土派，仲話果時同梁頌恆、游蕙禎扮Friend，都係要畀人睇到自己幫緊梁、游，仲話公眾係白痴添。嗱，扮本土或者扮「港獨」，都已經係對支持者極大嘅侮辱，而家鄭松泰講埋出口話支持者係白痴，即係叫啲人以後唔好投票畀佢啫！

再投票給鄭松泰 就真的白痴？

其實呢，一直以嚟都有好多人質疑鄭松泰嘅政治立場，因為佢話晒都係喺北京大學博士畢業，受訪嘅時候又話自己「流嘅係中國人嘅血」，點睇都唔似係本土、「港獨」派，今次佢親口承認佢幫梁、游只係想人以為佢係本土派，擺到明就係扮本土、呃選票！佢實際係咩政治立場，囍雨都真係搞唔清楚，唯一肯定嘅係，鄭松泰既唔係本土派，亦唔係溫和泛民，佢嘅定位應該係「抽水派」，無理念可言，扮咩角色抽到水，佢就會扮咩。

其實扮本土係冇問題嘅，因為每個從政者或者政客都需要一個好嘅定位，吸引市民支持，係真定係扮，好多時得當事人自己先知；不過，鄭松泰今次真係超過分，明明喺度扮嘢「呃支持」都算，仲要話「公眾係白痴」，即係好似同緊人講，「我明明就係喺度扮本土，你哋支持我，係你哋白痴啫」。囍雨就覺得，鄭松泰之流成日話要用選票懲罰邊個邊個，而家佢既然話大家係白痴，下次選舉嘅時候大家識做啦！

事實勝於雄辯 鄭松泰狡辯也無用

對於有錄音流出釀成「關公災難」，鄭松泰就辯稱佢只係話當日有份支持梁、游而令黃毓民敗選嘅人「全部都係智力有問題」，不過囍雨唔係就唔係咁睇喇，佢明明話要同梁、游扮Friend，顯示畀人睇自己幫梁、游，因為公眾係白痴，突然之間將「公眾」變成只係話「支持梁、游嘅人」，唔知鄭松泰呢啲係搬龍門，定係語言偽術呢？

事實上，鄭松泰個Record一向都麻麻地，一時又叫人去抗爭，推啲支持者去衝、去死，轉頭畀人質疑就話自己抗爭前提係唔會被捕，即係好似話畀人聽犯法前提係唔會被拉咁，佢呢個博士嘅邏輯思維「神化」到令人難以捉摸；仲有喎，佢參選前成日扮勇武派，到成功當選就話要撤出社運，重回社區工作，本身因為支持社會運動而投票畀佢嘅人真係畀佢Fake晒，完全呃到！呢個熱血公民主席到底係真熱血，還是扮熱血？仲要問？好明顯係呃選票嘅政棍啦！

原圖：Takungpao