立法會今朝繼續討論緊嗰個針對特首梁振英嘅無聊彈劾案，呢件事同立法會嗰個已經毫無公信力可信嘅「調查UGL事件專責委員會」有直接關係，其中，一向喺「UGL事件」裡面有晒既定立場，睇唔到點解可以公允處事嘅民主黨林卓廷，今日就喺立法會裡面話，「專責委員會應該是不偏不倚、獨立行事，看證據、看事實去作出跟進」，囍雨聽完後，個心即時寒一寒，繼而笑咗出嚟，心諗：「吓？乜佢都知專責委員會要不偏不倚架咩？」

林卓廷早於2014年已作失實批評

林卓廷做立法會議員之前，係民主黨嘅總幹事，之前亦做過幾年廉政公署嘅調查主任，喺廉政公署裡面算係非常初級嘅職員。佢一直以來都以「反貪英雄」形象示人，但其實老早就畀真正廉署退休嘅高層踢爆，林卓廷接觸過嘅個案相信唔會太多，而且亦唔見得佢對反貪法例有幾深認識。

自從「UGL事件」大約三年前被澳洲傳媒披露之後，林卓廷就一直咬住件事唔放；本來鍥而不捨，外人係唔應該質疑佢嘅，之但係咁喎，林卓廷自從2014年開始，已經先後多次同「UGL事件」裡面事實不符嘅言論，其中最經典，一定要數2014年10月，佢喺《蘋果日報》上面刊登嘅文章，裡面直接指控梁振英「收非法回佣」，其後即使證實呢項指控完全唔係事實，林卓廷亦冇收回過相關言論。

走入議會搞政治攻訐？

成為立法會議員之後，林卓廷更加係變本加厲，身為報案人嘅佢，喺立法會內以起立方式成立一個所謂「專責委員會」去調查「UGL事件」，佢其後仲要成為埋呢個委員會嘅成員，有份調查「UGL事件」添。不過大家唔好唔記得喎，其實林卓廷自己一早已經去咗廉政公署報案，即係話佢同另一個充滿利益衝突嘅委員、會計界立法會議員梁繼昌一樣，都係身兼「報案人、主控官及陪審員」三種身份，角色衝突同梁繼昌一樣咁明顯！

早有既定立場 林卓廷沒資格留任

仲有仲有，最新鮮熱辣嘅例子，係林卓廷喺立法會特首答問會上，趁機會就「UGL事件」質詢梁振英，當梁振英有咗解釋後，林卓廷即刻話對方「呃人」，仲叫梁振英做「人渣」添。

去到呢度，囍雨真係忍唔住要爆喇：喂，林卓廷你身為專責委員會成員，喺委員會會議之外質詢當事人梁振英關於「UGL事件」嘅問題，本身已經唔多妥，當梁振英回答你問題後，你又即刻話人「呃人」，真心想問一句，你憑咩咁講呀？委員會連會都未開，你有證據咩？你睇過晒所有文件喇咩？未的話，咁即係林卓廷一早已經有主觀判斷啦，咁立法會個專責委員會又點可能公平公正呀？

講到底，囍雨認為除咗梁繼昌唔適合做委員會成員外，林卓廷其實亦不遑多讓，佢一早有既定立場、從未收回失實言論、未審先判認定梁振英有錯，最嚴重係，佢同梁繼昌一樣都係有角色衝突，一人分飾三角，無論點睇都好，佢都唔應該留任委員會成員一職，若佢同梁繼昌唔肯辭職的話，咁索性就解散呢個「UGL委員會」啦，橫豎都冇晒公信力啦，要嚟做咩啫！

圖片來源：香港電台即時新聞