發展局局長馬紹祥日前公布《可持續大嶼發展藍圖》，決定繼續以「北發展、南保育」概念去發展大嶼山。根據計劃，大嶼山發展計劃落實後，可以容納約70至100萬人居住，另外，由於除咗住宅之外，計劃仲會包括埋商業區，故此預計可以提供約47萬個職位。嘩，咁好嘅計劃，點睇都冇理由阻撓啫，但偏偏我哋個立法會選舉新界西票王朱凱迪就唔係咁諗喇，佢今日喺立法會度又再次玩拉布，提出中止待續，係都唔畀呢個計劃行落去，到底佢個腦係乜構造？身為立法會議員，點解可以咁漠視民生？

增聘基本職位 與慳錢無關

是咁的，立法會人事編制小組委員會今朝開會，討論政府因應大嶼山發展計劃而設立新辦事處，開得辦事處，自然要增加人手啦，於是咪向立法會申請增聘啲編外職位囉，包括一個首席政府工程師、一個政府城市規劃師，同埋兩個總工程師職位，呢啲職位好正路啫，有咩好拗呀？

可惜吖，偏偏我哋個新界西票王唔係咁諗嘢，開會冇幾耐，朱票王就提出「中止待續議案」，簡單啲講，即係唔畀立法會繼續傾落去！朱票王話喎，開設大嶼辦事處茲事體大，佢著眼於三個原則︰第一、係咪慳到錢，第二、如果政府這麼認為這事可幫到市民，可唔可以將發展決定權還返畀市民？第三、新發展土地是否真得變成一個最大量負擔房屋，令市民得到好處？」

朱凱迪由始至終都在反發展

講就講得好好聽，但大家有冇發覺，其實朱票王係自相矛盾嘅呢？首先，成個大嶼大發展計劃慳唔慳到錢，根本同呢幾個新增職位冇關係，呢幾個職位根本就係運作一個辦事處嘅基本要求啦，落實計劃的話一定要請呢幾個職位架喎，唔係搵邊個嚟做嘢先？

至於關於成個計劃係唔係可以令到市民得到好處，大佬呀，朱票王你都唔畀個辦公室開始做嘢，咁政府又點樣可以做個計劃書出嚟畀立法會審批呢？第時真正要發展大嶼山嘅時候，政府一樣要向立法會申請撥款架喎，如果政府計劃係幫到市民嘅，到時社會就會有壓力架啦！

拉布明顯與民為敵

講到底，朱票王而家喺第一步已經阻撓，即係連初期工作都唔畀政府做，擺明就係「反發展」，置千千萬萬上唔到樓嘅香港市民死活於不顧！囍雨再講一次，今次嘅發展大嶼山計劃，預計最終可以為70至100萬人提供居所，同時可以提供約47萬個職位，朱票王繼續諸多藉口去阻止，其實就係與民為敵，為咗自己所謂理想，而置下一代福祉於不顧！

圖片來源：頭條日報