嘩，傻的嗎？身為凡事都反對嘅反對派成員、會計界「扮稅務專家」立法會議員梁繼昌，今日喺立法會特首答問會上話，政府因應OECD（經濟合作暨發展組織）要求而修訂有關飛機租賃嘅稅務條例，咁做係令到香港嘅立法權被削弱喎。大家聽唔聽得出呢個問題有幾荒謬呀？政府為咗幫自己國家地區拉生意，修訂稅務規定根本就係國際標準，加上今次出聲嘅係一個非常有影響力嘅國際組織，特區政府做正常嘢，你梁繼昌都要質疑？反對派唔係成日話要國際標準嘅咩？乜龍門又變咗喇？

OECD乃具規模國際組織

先講講OECD係乜先，OECD係由全球35個市場經濟國家組成嘅「政府與政府間」國際組織，總部設喺法國巴黎；成員之中，經濟實力比較強嘅國家，有反對派最喜歡嘅美國、港獨派最眷戀嘅英國，另外被世界銀行列為高收入經濟體嘅國家就有：德國、法國、日本、韓國、意大利、瑞典、瑞士、西班牙、挪威、冰島、丹麥等等。香港呢？香港係以「觀察員」身份參與OECD一啲委員會嘅工作。

剩係睇成員國名單，都知道呢個組織唔係細規模，喺國際間當然亦有影響力，講真吖，國際貿易呢啲嘢，永遠都係談判、談判，再談判，不同經濟體之間透過呢種文明方式，爭取到最有利營商條件，而稅務當然就係其中之一。香港要同其他國家地區做生意，自然就要同其他國際組織談判，就算要修訂稅務安排，亦係正常過正常，呢種不涉政治嘅談判，同「干預」完全冇關，亦同「影響立法權」完全冇關。講真，你唔肯修訂咩？咁OECD成員國隨時唔同你做生意囉，梁繼昌係唔係想咁？

因貿易需要調整稅務屬正常

稅務對香港經濟同貿易有幾重要？從財政司司長陳茂波喺卸任之前，都要加緊腳步成立稅務政策組就可見一斑，講到底，稅務改革、修訂，根本就係國際貿易一部份，以「稅務專家」自居嘅梁繼昌，居於喺答問大會提出咁無聊嘅問題，到底佢真係唔識唔明，定有心想搵機會誤導市民先？

不過諗落，其實梁繼昌都幾好笑；之前佢班反對派自己友成日走去唔同國家地區嘅行政同立法機關告狀，話香港呢樣唔好、嗰樣唔掂，呢啲國家有心抽水，又成日發表埋嗰啲所謂研究報告批評香港，呢啲咁不折不扣嘅「真干預」，又唔見以梁繼昌為首嘅一班反對派出聲譴責？梁繼昌咁反對特區政府同國際組織溝通，咁第時發生呢啲「真干預」事件後，麻煩梁繼昌都出句聲支持特區政府喇，身為「稅務專家」喎，唔會唔肯啩？

圖片來源：星島日報