用作改革醫務委員會架構嘅《醫生註冊（修訂）條例草案》，將於下個月七號提交立法會審議。呢條條例上次提到立法會時，以非建制派為首嘅自私精，為咗保障既得利益，不惜同病人組織以及全香港市民為敵，無厘頭拉倒政府提出嘅改革方案；今次再度闖關，政府滿足個別所謂醫生代表嘅訴求，將新增嘅委員需要由特首委任呢一部份撤走，誰不知公民黨郭家麒仍然唔滿足，話因為醫生專業自主未受保障，所以仍然要反對。好大嘅官威囉，郭家麒，講到尾，身為專科醫生嘅郭家麒都係唔想醫生受到監管，根本就係與民為敵。

新方案滿足各方訴求

之所以話政府新嘅方案已經滿足激進醫生代表嘅訴求，全因政府撤去建議中新增嘅四名業外委員，最終需要由特首委任嘅安排。換而言之，將來三名由病人組織選出、一名由消委會提名，將來喺所屬組織選出後，就會自動成為委員，不需由特首委任。

另外，新建議中，原本由特首委任嘅醫專委員，亦會改為由醫專自行選出，選出後亦毋須再由特首委任；簡單而言，如果最終方案可以通過，非委任委員將佔三份之二多數，而由醫生選出嘅委員比例亦佔一半！

睇到呢啲統計，相信大家都不禁會問：「唔係呀嘛？咁多唔收貨？」係呀，郭家麒真係話唔收貨呀，佢話喎，唔滿意由醫專選出嘅委員，唔係由全香港註冊西醫選出，所以要反對喎。

「醫專」地位超然 可以客觀處事

睇到呢度，粗俗啲講句，郭家麒可能真係反政府反到上咗腦，連乜嘢叫做「問責」都唔識；醫專喎，香港醫學專科學院喎，真係香港醫學界殿堂之一喎，由佢哋根據自己章程選出可以超然處事嘅醫委會委員，請問有咩問題？

正因為醫專地位超然，所以佢哋處理投訴或者關於香港醫療制度發展嘅問題時，可以站得更高、睇得更遠，佢哋同大學醫學院嘅代表一樣，可以較為客觀持平處事，呢啲正正係香港市民所需，郭家麒作為民意代表，點解要反對？

郭家麒只想「醫生獨大」

囍雨唔敢揣測郭家麒反對嘅理由，喺呢度不妨套用自由黨主席張宇人嘅說法，「自私囉，郭家麒咪就係自私囉！」呢句說話唔係冇道理架，郭家麒堅持反對政府新方案，畀人感覺正正係唔希望醫委會改革後可以「客觀」同「超然」處事，反而似係希望醫委會「醫生利益為先、病人利益為後」，嘩，真係聽到毛管直豎，公民黨黨籍嘅佢真係自私到得人驚呀！

點都好，囍雨真係希望所有香港市民留意住今次事態發展，如果有立法會議員真係投反對票的話，咁好簡單，呢個人就係與民為敵，唔係以香港市民及病人福祉放到最前，郭家麒最後點投票，大家拭目以待啦！

圖片來源：文匯報