特首梁振英同民記周浩鼎商量之後，由周浩鼎提出修訂立法會調查UGL事件專責委員會（委員會）裡面嘅研究範疇，雖然修訂內容完全不影響調查工作，亦冇收窄委員會嘅調查範圍，但由於引起社會關注，周浩鼎今日宣布辭去委員會委員職務。周浩鼎嘅決定，表現出絕對負責任嘅態度，反而委員會裡面另一個利益衝突更明顯嘅委員梁繼昌，直到執筆之時仍然賴死唔走，換句話說，梁繼昌一日唔走，呢個委員會嘅公信力始終都受盡質疑！

梁繼昌誹謗官司纏身怎中立？

眾所周知，而家梁繼昌官司纏身，佢因為涉嫌誹謗梁振英正受香港，甚至外國稅務機構調查，被而梁振英控告誹謗。只有對呢單個案有少少認知嘅人都會清楚，呢宗誹謗案，係真接同UGL事件有關，佢而家竟然可以做到委員會嘅成員、負責調查UGL事件，無論點睇都好，都充滿利益衝突喎！

仲有，大家只要睇返UGL事件委員會嘅研究範疇，裡面正正有一項係涉及稅務問題，囍雨真心想問，如果委員會調查進入呢部份，梁繼昌係唔係完全避席、唔發言、唔投票、唔表態先？不過就算係咁，亦唔代表佢適合去做呢個委員會嘅成員喎；大佬呀，你班人指控梁振英逃稅足足兩年以上，公眾真心好想知梁振英有冇畀稅局查架，你梁繼昌完全唔可以出席呢部份調查，咪即係廢晒武功囉？咁仲要你嚟做乜先？

非建制派「N重標準」

再者，就當退一萬步講，當梁繼昌「冇」利益衝突先算，梁繼昌同受調查對象梁振英正對簿公堂，直接啲講，即係私下有轇轕啦，甚至好有理由相信，梁繼昌身為民事案件被告，對梁振英會有偏見喎！就算佢自己話冇都好，佢點令到千千萬萬香港人相信，自己可以客觀公正處事先？記住呀，梁繼昌除咗代表自己界別選民之外，你仲係全香港人嘅立法會議員嚟，囍雨夠膽講，對你有所懷疑嘅，一定唔係少數，咁你仲憑咩留喺個委員會裡面唔走？

不過算啦，講到尾，非建制派人士永遠都係「N重標準」，待人以嚴、律己以寬，你哋話周浩鼎唔適合繼續做委員會成員吖嘛、話佢喺委員會裡面再冇公信力吖嘛，好啦，咁佢辭職以示負責，咁點解非建制派對待梁繼昌又可以「雙重標準」？梁繼昌嘅利益衝突會比周浩鼎細咩？咪玩啦！

圖片來源：香港電台即時新聞