仲有唔夠兩個月就係香港回歸祖國20周年嘅日子，喺呢個理應普天同慶嘅日子，慣常都係政府、建制派人士慶祝回歸，非建制派就搞佢哋一年一度嘅「7.1大遊行」，不過今年比較特別，就係維園大球場畀香港各界慶委會借咗，民陣要另覓地方做遊行地點。本來維園球場作為公眾地方就無話專屬於邊個團體嘅，但民陣一邊話「打壓」，又要慶委會借番部分場地畀佢哋，好似唔多合理喎！

要求慶委會讓出部分場地？

對於維園球場應該借畀邊個，囍雨覺得道理非好簡單，邊個借先、邊個符合康文署優先次序，就應該借畀邊個；如果民陣覺得唔應該借畀慶委會，咁掉番轉如果係民陣借到場地，慶委會又要話政府「打壓」？今次慶委會一早入紙借6月下旬至7月初，又係康文署內部指引入面較優先借用場地嘅團體類別，如果唔借場畀慶委會，康文署係咪又有政治考慮呢？再者，維園球場作為公眾地方，係屬於公眾嘅，如果民陣覺得唔畀佢哋用就有問題，呢個係一個不當預設。

囍雨另一點唔明白嘅，係點解民陣覺得慶委會應該讓出部分場地畀佢哋用，如果慶委會拒絕借出場地，遊行可能就會喺銅鑼灣「遍地開花」；喺遊行起步嘅問題上，囍雨同意康文署、警方應該協調，喺可行情況下安排民陣喺適當地方做遊行起步，但講到慶委會好似要分番部分場地畀佢哋用咁，其實對慶委會唔係好公道喎！人哋借咗個場，當然有佢用途，囍雨想問下民陣召集人區諾軒，如果佢喺體育館Book咗個羽毛球場，有人行埋去話要用佢半個羽毛球場，佢會唔會都有啲愕然先？

7.1用維園等於政治工具？

民陣另一個不當嘅預設，就係區諾軒覺得慶委會拿參展當「政治工具」，囍雨覺得區諾軒嘅「道理」，就係民陣喺7月1日下午用開維園球場，如果有其他團體借用球場，理論上就係政府、建制「霸」住球場嘅「政治工具」，試想想，如果今次借用場地嘅唔係慶委會，而係某體育會舉行大型球賽，咁同樣「阻住」民陣遊行，係咪都要讓路呢？如果唔讓路，係咪又成為「政治工具」？大家可以諗下，係咪因為民陣係搞政治、搞遊行，康文署就要因為佢哋班「民主派」夠惡，就唔理規則、不論如何都要優先畀個場佢哋用先？

原圖：crntt