因為急性肝功能衰竭而接受換肝手術嘅鄧桂思，佢17歲未成年嘅女，因法例所限唔可以捐出肝臟，情況曝光後引起全城關注。到底鄧桂思點解會出現急性肝衰竭，聯合醫院尋日可能已經公布咗答案，原來該院醫生涉嫌用藥不慎，直接令到鄧桂思出事。呢宗醫療事故，人人都唔想見到，唯獨公民黨郭家麒好似如獲至寶咁用嚟抽水，猛話件事同特首梁振英委任「梁粉」入醫管局有關；郭醫生，好心你抽水行遠啲啦，明明就醫療失誤涉事醫生同醫院最大責任，你作為代議士做乜要轉移視線包庇佢哋先？唔通係「醫醫相衛」？

郭家麒亂抽水惹人討厭

話郭家麒抽水，並唔係無的放矢。我哋先睇睇聯合醫院醫生到底做錯咗啲乜！鄧桂思早於2008年已經向聯合醫院求醫，紀錄亦顯示佢係「乙型肝炎」帶菌者。舊年7月，鄧桂思因為血壓高到聯合醫院腎科門診求醫，確診「甲型免疫球蛋白腎炎」，分別喺今年1月同2月兩次去到聯合醫院，由兩名唔同醫生診療，兩名醫生竟然都唔知鄧女士有「乙肝」，不約而同處方類固醇，但就冇同時處方抗病毒藥物。負責治療鄧女士肝衰竭問題嘅瑪麗醫院醫生講到明，鄧女士嘅肝衰竭，同佢冇同時服用抗病毒藥「好大機會」有直接關係。

囍雨用咁多篇幅講呢個個案，無非係想帶出，聯合聯院同涉事兩名醫生責無旁貸，唔好以為乜都好似郭家麒咁，賴晒落個制度出錯就可以。郭家麒話醫管局好多嘢需要改革，認同架，但到底呢個個案同「制度」有咩關係？資源不足？醫生不足，令到唔可以深入理解到病人情況？撫心自問，呢啲係唔係理由先？

聯合醫院醫生犯最基本錯誤

醫生診治病人，尤其係要處分高劑量類固醇前要先了解病人病歷，呢個基本過基本啦，就算制度有不足，醫生都唔可以跳過呢步喎，跳過咪即係拎病人條命「較飛」？對醫生嘅責任輕輕帶過，無啦啦剩係集中講制度，咪又係以偏概全嘅一種！

最離譜嘅係，郭家麒無啦啦將件事推落梁振英身上，話醫管局大會嘅人選令醫管局出問題喎。潮流興FACT CHECK，囍雨又即管同你FACT CHECK一下，即管睇吓醫管局大會裡面係乜人吖。

郭家麒要求政治立場大於一切？

現任醫管局主席係曾做過公開大學校長嘅醫科學者梁智仁，夠晒料，唔使拗。其他成員呢？唔計3名政府代表，其餘廿幾人全部都來自不同專業背景，有人力資源、市場推廣、金融財務、行政管理、會計帳目、法律事務、社工、醫療專業等等。

你硬要話「梁粉」嘅，最多係前行政會議成員林奮強；不過，林奮強退休前係出色嘅投資銀行家，退休後成立智庫「香港黃金五十」，曾經發表過《如何建立世界級醫療體系》研究報告，講真材實學，一定唔比郭家麒差囉！

諗深一層，郭家麒說法非常奇怪，以佢咁講，委任人入去公營機構，原來最重要政治立場為先，如果唔係，就當政府委任入醫管局嘅都係建制派都好，咁有咩問題呢？最重要係佢哋有冇以事論事、用專業知識幫助醫管局向前行啫，點解一定要搵非建制派呢？唔通郭家麒嘅潛台詞係，只要獲委任嗰個人立場「反政府」就得，唔使有專業背景？

郭家麒政治凌駕一切

郭家麒，水唔係咁抽架。與其話醫管局制度有問題，不如大家諗諗點樣增加香港醫生人手啦！囍雨諗極唔明，其實香港社工註冊局都認何部份外國大家嘅學歷，等喺呢類認可學校畢竟嘅人可以返嚟香港註冊做社工同工作，點解香港唔可以？點解以郭家麒為首嘅醫生，硬係覺得港大同中大嘅醫科畢業生，質素一定比英、美名校畢業嘅醫科生出色？WHY？

仲有喎，之前醫委會改革方案放到上立法會，政府建議增加病人組織代表，當時郭家麒就盲目支持當時醫學界立法會議員梁家騮「拉布」，最終將方案「拉死」。今次聯合醫院醫療事故，郭家麒再次逆民意企喺醫生嗰邊，代議士喎，病人權益唔使理啦？

圖片來源：大公報