近日，候任行政長官林鄭月娥開始同唔同黨派嘅政界人士會面，囍雨見到有唔同政治光譜嘅議員都要求林鄭月娥喺未來任期重啓政制改革；根據傳媒報道，有議員引述指，林鄭月娥喺未來五年會認真考慮重啓政改，但前提係社會氣氛適合。囍雨認為，重啓政改嘅前提，除咗要視乎未來嘅社會氣氛，仲要睇非建制派願唔願意放低成見，喺一定嘅框架下推動政改，否則就算佢哋而家講到幾想重啓政改，到時又話一定要「公民提名」等，重啓政改隨時再次變成撕裂社會嘅炸彈。

在8.31框架下討論可以嗎？

非建制派雖然一直要求重啟政改，亦要求取消人大常委會作出嘅「8.31框架」，但其實大家都明白，「8.31框架」作為人大常委會定嘅框架，要取消喺現實上根本唔可行，如果到時非建制派又非要「公民提名」不可，繼而以唔同方式爭取甚至「勇武抗爭」，到時就算唔會再發生類似違法佔領嘅事件，社會難免會因為政改而對抗、撕裂起嚟，就算社會氣氛本來適合，最後都會一再變成「不歡而散」！

囍雨認為，要喺「8.31框架」之下討論政改，其實並唔係冇可以改善嘅空間，誠如全國人大常委會范徐麗泰所指，大家係咪可以傾下提名委員會嘅組成，例如擴大提名委員會選民基礎呢？當政改通過，提名委員會嘅組成係咪可以一步步改善，循序漸進咁改善本港嘅行政長官選舉、立法會選舉制度呢？

強求一步到位 只會再拉倒

可能有人覺得，如果重啓政改，就要「一步到位」，即刻實行非建制派所想嘅政改方案；不過，囍雨覺得民主係一個循序漸進嘅過程，而且香港又係國家一個特別行政區，行政長官需要同時向香港同中央負責，好難完全複製西方國家嘅總統選舉制度，先由提名委員會着手，擴闊選民基礎同代表性，盡力改善提名委員會組成，係最實際而且比較穩定嘅方法。

唔好話囍雨多心，如果喺「8.31框架」、提名委員會嘅問題上，來屆政府、建制派同非建制派冇一個大致嘅共識，貿然重啓政改，隨時變成一個再次「轟炸」香港嘅「大炸彈」，到時就算有「拆彈專家」幫手，睇怕香港都會再一次陷入撕裂、內耗不絕嘅局面，最終政改又再拉倒，爭議無日無之！

原圖：gov.hk