過去幾日，香港都冇乜大新聞，香港紅十字會血庫告急，經呼籲後獲大批市民支持，可能就係當其中最大嘅一單。呢單新聞之所以受到重視，除咗因為血液係冇代替品，有實際需要嘅傷者病人必須靠輸血救命之外，香港紅十字會早幾日喺社交網站上面嘅一則呼籲帖子，遣詞用字受到部份玻璃心網民質疑，同樣引起一陣不大不小的風波。事過境遷，大家冷靜落嚟之後，係咪真係仲覺得香港紅十字會係咒緊自己呢？

詛咒？邊度有詛咒呀？

香港紅十字會嘅帖點講呀？佢哋話：「血庫存量僅餘4日，與我何干？但如果4天後急需接受輸血治療的是身邊人，仍然與你無關嗎？」唔好意思，囍雨由頭到尾睇咗個帖幾十字，逐隻字睇、慢慢睇、細心睇，睇極都唔明邊度有詛咒或者恐嚇嘅意味，之前已經講過，血液係冇代替品嘅，有實際需要嘅傷者病人，一定要靠輸血去救命，講真，唔危急都唔會輸血啦，香港紅十字會都係呼籲大家代入去病人傷者嘅處境啫，到底所謂「詛咒」來自何方呢？

講到底，呢單嘢被人成功炒起，其中一個理由係今日香港真係好多玻璃心，呢班玻璃心以為對住個電腦就係一切，小小事就無限上綱去胡亂批評一番，認真搞笑。老老實實，香港紅十字會近年都不時被部份所謂「本土派」針對，呢班「本土派」不斷散播謠言，話市民捐去香港紅十字會嘅血會送到內地，呢啲同事實完全相反嘅指控，目的咪又係要炒作「兩地矛盾」，從而達到政治目的囉。

救人助人 理應無分國界

講返香港紅十字會，個會嘅副顧問醫生梁雅詩今朝接受傳媒訪問時提到，直到現時為止，所有香港紅十字會收集到嘅血液，全部都係喺香港度用，即係話所謂將血送到內地嘅說法，完全係子虛烏有。咁仲唔止喎，香港紅十字會喺非常危急嘅時候，即係例如有喺香港求醫接受治療嘅傷者病人，若然佢哋嘅血型非常罕有，而香港紅十字會又冇庫存的話，香港紅十字會亦會向其他國家或者地區嘅血庫求助，尋求合適血液。

吓？乜香港會問其他地方拎血架？呢個真係唔講唔知囉！真係架，講到尾，要救嘅都係一條人命，只要有一絲機會，當然都唔可以輕輕放過，一定要救咗命先講啦。香港曾經其他國家、地區拎血救人，囍雨反而想問今日香港嗰班所謂「本土派」，假設未來有其他國家地區嘅醫療機構，因為要救人而緊急需要向香港紅十字會拎血，大家覺得應唔應該畀？又假設求救嘅係來自內地嘅傷者病人，大家係咪唔救先？

「本土派」主張有違普世價值

喺今時今日嘅政治氣氛下，我相信唔少激進本土派一定話：「唔救！唔畀！關我咩事！」等等；去到呢度，等囍雨做個「醜人」，學香港紅十字會咁問一個問題：「如果今次見死不救，他日若然香港有人，好不幸咁需要其他地方送血嚟搶救，香港仲要唔要好？」

上述呢個問題，答案相信顯而易見，講多都費事。正所謂「救人一命勝造七級浮屠」，「本土派」要故步自封，冇人阻到你哋，但唔該唔好阻住正常香港人去救人助人，可唔可以呀？

圖片來源：Takungpao