廣男份人一向好溫和，唔鍾意用人身攻擊嘅說話去批評人，不過近日見到香港眾志黃之鋒又去美國「唱衰」香港，廣男終於明白，點解啲人見到佢就鬧到唔停口。之所以話佢「唱衰」，並唔係因為佢去外國批評中央同特區政府，講真，呢個係佢自由，只要言論客觀同公道，咁佢想做咩咪做咩囉；之不過，黃之鋒去到美國國會所講嘅確實離晒譜，例如話「違法佔領」搞手被起訴係「政治檢控」咁，唔通喺佢心目中，民主派人士犯法就唔使「找數」、行為免責？

又要搞事　又唔想找數？

黃之鋒今次去美國國會聽證會，話「違法佔領」有人被捕，事件係「政治檢控」，呢種說法，擺到明係抹黑政府同執法機構！無論叫「違法佔領」，抑或佢哋口中嘅「雨傘運動」都好，事情本質就係用違法手段脅迫政府就範，而家做咗違法行為，稍有廉恥嘅人就算唔認罪都知道自己有問題啦，但黃之鋒仲要掉轉槍頭話執法者唔應該執法，不如佢坦白啲，承認佢哋班民主派人士所講嘅「公民抗命」、「以法達義」全部都係呃人嘅！

仲有，黃之鋒另一個過晒火位嘅地方，就係公然走後門，喺聽證會上要求向美國國會提起自己嘅「戰友」、即係「違法佔領」另一主導人物前學聯秘書長周永康，話佢已經獲美國名牌大學接納讀博士學位，但因為有案底，所以申請簽證過程可能會困難重重喎。

大佬呀，你班人唔係話「公民抗命、無畏無懼」嘅咩？違法畀人檢控，定罪後有案底，呢啲套餐嚟架啦，而家公然向美國國會喊冤？咁畀你畀人呃晒出嚟犯法嗰班人點呀？邊個幫佢哋要求美國幫手走後門呀？你犯法就繼續有書讀，畀人呃嗰班人就冇呀？

屢屢唱衰香港 居心叵測

廣男重申一次，話黃之鋒去外國「唱衰」香港，真係冇話錯佢，講嘅唔係事實之餘，當中更涉及個人利益添。查實佢「唱衰」香港嘅次數，已經多到用晒十隻手指先數得晒，剩係去美國都已經去咗三、四次，其他地方仲有英國、泰國以及台灣等等，講嚟講去，都係講到香港「司法已死」咁；廣男好想同黃之鋒講，如果執法部門唔檢控你哋呢班破壞社會安寧嘅人，咁香港就真係「司法已死」喇！