土地房屋短缺，基本上係近年社會各方人士講到「口水都乾」嘅老問題，剩係睇公屋輪候冊果29萬宗申請，就知道有好多好多好多（重要嘅要講三次）人等緊「上樓」！偏偏喺呢個關鍵時候，社會上仍然有好多人要阻止政府覓地建屋，就連本身只係喺農地起樓嘅寮屋戶，都唔畀政府收地起樓。囍雨唔明白，乜寮屋唔係「暫准存在」，政府只係當年特准呢啲寮屋存在，直到政府有公共發展用途就要交番屋同地出嚟嘅咩？

寮屋位處官地、農地　本身不能居住

今朝囍雨如常喺搭車番工嘅時候聽電台節目，聽到橫洲鳳池村有個居民接受電台訪問，話政府只係用60萬特惠賠償畀佢哋太少，質疑政府點可以用幾十萬就收佢哋1,000呎地、2,000呎屋咁話，聽到囍雨耳都「側」埋！冇錯，政府用幾十萬就收人地、收人屋，表面睇好似唔係太合理，但橫洲被要求遷拆嘅地，係咩地先？如果村民果啲係農地、官地，本身就唔可以用嚟起樓居住架喎！

講番少少寮屋嘅歷史，香港喺50、60年代，人口隨住大量內地移民湧入而急劇上升，數以十萬計市民喺未發展、批租嘅政府土地或者已經批租嘅私人農地上搭建寮屋，政府喺80年代初規管寮屋，宣布容許已登記嘅寮屋繼續保留，但日後有關土地要用作特定公共發展用途嘅時候，政府有權收番有關土地發展！簡單而言，寮屋戶因為歷史原因而喺有關土地起屋，政府體恤寮屋戶而畀佢哋「暫准存在」，但日後如果有需要發展土地，政府絕對有權收番有關土地。

政府收地建公屋 乃正當不過

講番橫洲計劃，撇除政府係咪有權利收番寮屋、土地嘅問題，反對政府嘅人係咪應該都諗下，政府今次收地嚟做咩呢？政府之所以要發展橫洲，係因為要喺橫洲起公屋，解決基層住屋需要，情況同當年政府畀寮屋暫時准在，以舒緩基層人士住屋問題的目標相近。橫洲寮屋戶想保存佢哋嘅居住環境，當然可以理解，但應該畀佢哋繼續住喺官地、農地，定係畀政府收番啲地起以千計、萬計嘅公屋，應該唔難抉擇。

有寮屋戶可能住開2,000呎，覺得遷拆之後住唔番咁大，賠幾十萬畀佢哋無乜用；但將心比己，寮屋戶喺本身唔可以居住嘅土地上住咗十年甚至幾十年，而家社會有需要興建公屋，佢哋交番土地出嚟畀政府起公屋唔係應有之義咩？佢哋享受咗「特權」咁多年，但其他「蝸居」喺劏房嘅人就「上樓」無望，公平咩？！

囍雨明白，話寮屋戶有「特權」，有啲人可能唔係好同意，但佢哋的確係享有緊其他市民未必有嘅權利，佢哋住喺官地、農地咁多年，唔駛補地價，而且普遍居住面積大過唔少基層市民，大家可以諗下，要寮屋戶交番土地出嚟起樓，係政府做法不公義，定係寮屋戶於理有虧呢？