「佔領中環」行動日前舉行既所謂「全民政改商討日」，先由「專家」篩走大部分建制派肯定合乎《基本法》既方案，然後由一班「佔中」死硬派選剩三個方案喺下個月畀市民「公投」喎。原本「佔中」班人搞乜都唔關囍雨事既，偏偏個所謂「公投」出嚟既方案，竟然關乎最後會唔會發生「佔中」，咁就唔係咁講法喇，直頭個個香港人都關事、個個都係持份者！事實上，「佔中」行動班人篩完又篩，然後就愚弄市民話自己方案係最合民意，但大家又知唔知道，佢篩呢三個方案出嚟既方法，其實同走去足球隊主場，問班球迷鍾意邊隊係冇分別既呢？

「佔中」行動班人自詡民主派，做事都扮晒要有民意基礎，唔係自己講咗就算。但試問由支持「佔中」既2500人選出嚟既方案，請問點代表全香港人既意見呢？大佬，你而家講緊「佔」唔「佔中」喎，唔係你班人自己選個令你自己開心既方案喎。唔好講話代表唔到中間派同建制派，佢哋既意向連溫和民主派都未必代表到，篩剩三個唔合法既方案，然後用嚟要脅中央同特區政府，點講都講唔通。

經常將「反篩選」放喺口邊，自己竟然對所謂公投既方案重複篩選，囍雨最佩服既就係戴耀廷佢哋面皮夠厚，可以將歪理變真理！如果打從一開始就留意「佔中」主事人既面目，其實就知道佢哋講「民主霸權」，點會講民意；由此至終，主流民意都反對「佔中」，但「佔中」三子唔理民意，講穿咗就係堅持「佔中」、唔理點都去「佔中」，好霸道呀！

事實擺在眼前，家陣「佔中」行動做既一切都只係為咗成功「佔中」做準備，起初的確好似攞到啲「道德光環」既，不過而家SORRY囉，西洋鏡已經拆穿喇，「佔中」行動口中既民意，只係啱佢哋用就搬出嚟、唔啱用就收埋佢既「垃圾」。「佔中」行動已經畀激進派騎劫，目的只係為「佔中」而「佔中」，而唔係真心想幫香港爭取普選，你話人心係幾咁恐怖吖。

仲有呀，有一個嚴重既問題大家未必留意，就係「商討日」之後民主派內部「鬼打鬼」，你批評我、我質疑你；試諗諗，日後「佔領中環」付諸行動，到時內部亦會「七國咁亂」，咁仲點可能做到「和平理性非暴力」呀？「佔中」幾個所謂「領導人」又點可能控制場面呀？香港市民，對住啲政治口號真係要小心，認真，你就輸了！

原圖：網絡圖片