喺今日香港嘅政治氣氛下，即使有理，亦可能永遠說不清。早幾日，嘉諾撒聖家書院校長邵苑芬修女就BCA（取代TSA的學生能力評估考試）接受電台訪問，講出自己支持BCA嘅理由，仲批評反對派帶小朋友上立法會公聽會係荼毒莘莘學子咁話。邵校長咁硬淨，堅守自己嘅教育理念，自然惹來反對派中人攻擊啦，其中「香港眾志」核心成員周庭仲老屈邵校信收咗政府錢就乜都得，呢種完全唔講道理嘅說法，再次凸顯呢班以「自決」為名嘅政客係幾咁污糟。

人講問責 你就講錢

周庭小姐點解會咁鬧邵校長呢？事緣邵校長喺訪問時強調，自己間學校一年收到2,800幾萬公帑支持，認為學校拎到咁多公家錢做事，就應該有問責精神、對社會有交代。其中，參加BCA正正係其中一項，因為BCA的確有效改善教與學，BCA報告畀各科嘅教師知道學生不同範疇嘅表現，拎住呢啲數據，教師就可以跟進學生嘅表現。

喂，呢個解釋都好正路啫，學校收得公帑，就係要教好學生，而且要用不同工具了解學生強弱，拔尖補底，好正常、好王道吓喎，收得公帑就要向公眾交代、要問責、要令到學生追得上水平，但係就周庭講成「政府出錢就是對」，好扭曲啫！

教育局一直有支援 周庭提都唔提？

仲有呀，周庭唔知有冇聽晒個訪問啦，邵校長其實係有節有理咁解釋晒校方支持BCA嘅理據，原來，教育局一直有做工夫，例如學校收到評估報告後，可以因應學生較弱嘅範疇，向教育局申請支援計劃，邀請專家去到學校支援校本課程。邵校長仲舉埋自己學校做例子，話舊年十月收到BCA報告後，佢間學校發現學生視聽資訊表現較差，學校即時跟進舉辦小主播活動，提供有趣嘅學習機會畀小朋友。

周庭，睇到呢度，唔知你有冇汗顏呢？聽講呢間係你母校添喎，如果我係你，一定會以呢間母校為榮。邵校長同學校支持BCA，完全唔係「盲撐」，一切都係出於教育理念同專業，唔似得你同「香港眾志」咁，事事「盲反」兼視專業如無物，一唔如你意就老屈老作，今次仲衰到屈自己母校校長「見錢開眼」，一流學校教出你呢種學生，真係悲劇。

盲反BCA 香港學生受害

點都好，希望社會唔好剩係一面倒聽扮專業嘅教協，同埋班反對派政客嘅意見。BCA成效係點，不如都係聽吓參與過嘅學校代表現身說法啦；呢班專業人士同教育工作者，一切都係以學生福祉同香港整體利益為依歸，事事政治化，為反而反，香港學生又點會有進步先？政府最初搞TSA，正正因為當年發現唔少小六學生，原來只有小三水平，「香港眾志」為反而反，係唔係想見到呢種情況重現？

圖片來源：香港經濟日報