近期興講「大團結」、「大和解」，評論政治領袖好，選特首亦好，個個都話要選一個可以團結社會各界嘅人，呢樣亦成為泛民選委成日掛喺口邊嘅「口號」。不過記住，呢個只係「口號」，因為呢班人同佢哋嘅支持者唔冇付諸行動。繼日前藝人蕭芳芳因為支持特首候選人林鄭月娥而畀班泛民支持者喺網上欺凌同侮辱後，一向係泛民中堅嘅社福界選委莊陳有，都因為支持同泛民理念最接近嘅胡官而受盡攻擊。呢班泛民同佢哋嘅支持者，甚至過份到連莊陳友本身係失明人士呢件事都拎嚟講，咁涼薄嘅事都做得出，仲話要社會「大團結」？咪玩啦！

人身攻擊 不堪入目

睇番莊陳有喺Facebook嘅貼文，寫得清清楚話因為胡官嘅社會福利政策最接近佢哋委嘅要求，又認為就算曾俊華做咗特首都好少空間對抗西環，所以決定投票畀胡官。老老實實，莊陳有嘅選擇，喺泛民嚟講相當正路，可以話係對得住自己良心，既堅守住原則，亦理解過候選人政綱，好正常吖。

但正因為莊陳有唔肯跟泛民一齊All-In（全投）畀曾俊華，佢隨即畀泛民班支持者追住嚟鬧，乜嘢「千古罪人」、「蠢人」、「死牛一邊頸」等，尤有甚者，有好刻薄嘅網民甚至指莊陳有「冇眼」睇嘢，擺到明係侮辱雙目失明嘅莊陳有，謾罵內容簡直係不堪入目！

莊陳有一直都係泛民主派，今次佢決定支持胡官亦都係有理有據，唔似得其他泛民選委咁，為鬥爭而支持曾俊華，呢班支持者唔睇政綱、理念、能力，只睇到莊陳有並冇企喺佢哋嗰邊，就當佢係敵人咁瘋狂攻擊，呢一種立場決定一切，不問是非、理據嘅攻訐手法，試問可以令到社會「大團結」咩？冇可能囉！社會撕裂再撕裂就真！

泛民支持曾俊華　是真心還是假意？

班泛民支持者為咗擁護曾俊華，蕭芳芳唔放過、支持林鄭月娥嘅選委唔放過，走去玩起底恐嚇，今日甚至連「自己友」莊陳有都唔放過。唔好畀囍雨講中，就算曾俊華成功當選，佢嘅支持者都只會繼續攻擊「非我族類」，就算係自己友，只要立場稍有不同，一樣係「有殺錯、冇放過」！

況且，曾俊華理念根本同泛民班人南轅北轍，泛民、個別媒體而家之所以一窩蜂擁去撐曾俊華，原因只有三個字，就係「反中央」！事事反抗鬥爭為先，乜咁樣就做到團結咩？冇可能囉！

沒有民意 只有「鍾意」

今日泛民選委，用「民意清晰」做藉口，掩飾自己支持曾俊華只係想鬥爭，囍雨心入面就有一個大疑問，上屆特首選舉最高民望嘅係梁振英，點解嗰時又唔見佢哋All-In支持梁振英呢？到2014年「反佔中」嘅時候，又有過180萬人簽名「反佔中」，點解佢哋仲要去「佔中」呢？口話尊重民意，其實都係睇班泛民鍾唔鍾意啫，相信佢哋代表市民投票嘅話，就真係「太天真、太傻」囉！

原圖：Facebook專頁截圖