違法佔領行動期間，曾健超向警員潑不明液體同拒捕而被判襲警、拒捕罪成，曾健超決定放棄上訴、即時入獄。仲以為佢終於承擔罪責，點知佢噚晚喺Facebook貼文竟然話襲警、拒捕係政府打壓異己嘅藉口，質疑市民點解有守法嘅義務，又話服刑唔係軟弱退縮。曾健超嘅支持者話佢係「英雄好漢」、「真心男兒」，真係令人O晒咀！

諉過於人 豈是英雄

每個人心目中都有英雄，但囍雨認知嘅英雄，一定要有承擔，啱嘅事要做，仲要把事做好，如果做錯咗，有錯一定願意勇於承擔，而唔係做完錯事就話係其他人嘅錯！喺曾健超襲警案，曾健超自己都有承認係向警察潑水（有人指係有異味嘅不明液體），基本上罪證確鑿，如果曾健超承認罪責又肯話自己錯，囍雨認為都仲過得去，但自己犯法反而想諉過於執法者，算咩英雄好漢呢？

根據曾健超喺Facebook嘅講法，佢話「襲警、拒捕、阻差辦公、非法集會、暴動的罪名便成為強權打壓異已的藉口。政府不守法，以暴力欺壓市民時，我們仍有守法的義務嗎？」囍雨想問，政府幾時以暴力打壓市民呢？我哋喺電視直播，甚至喺佔領現場所見，警察都十分克制，絕大多數時間都係被動地抵禦示威者嘅武力抗爭包括肢體語言暴力。曾健超嘅意思，係咪即係話佢自己襲警、拒捕冇問題，因為佢冇守法嘅義務？示威者不滿政府可以違法，甚至動粗打警察？呢個係咩歪理？示威者因為支持民主就唔駛承擔罪責嗎？

既聲稱被打壓 何不上訴到底？

囍雨唔敢講曾健超係因為怕加刑所以寧願早啲坐監，但曾健超如果覺得襲警、拒捕係政府打壓異己嘅藉口，佢可以上訴到底，等法庭裁決到底係佢犯下罪行，定係「政府打壓」；一邊放棄上訴而入獄，一邊又聲稱自己畀人打壓，係賊喊捉賊！

爭取民主，本土派、激進派以至溫和民主派都有唔同嘅手段，較激進嘅有時甚至會訴諸於暴力，囍雨反對暴力，囍雨更反對嘅，係有違法者使用暴力之後，聲稱自己畀人打壓，然後佢哋嘅支持者仲要話呢啲人係英雄！有承擔嘅，或者都稱得上係英雄，但剩係識諉過於人嘅罪犯，自以為係「英雄」，簡直污蔑咗「英雄」兩字！

原圖：takungpao