一手策劃違法佔領行動同雷動計劃嘅高教界選委戴耀廷，最近搞嘅「特首選舉民間全民投票」（下稱「民投」），希望收集民意畀班非建制選委做參考，仲聲言要100萬人參加。可惜，個計劃「講就天下無敵，做就無能為力」，結果只係得6萬人左右參與，連所謂泛民基本盤都唔到；其實就算個「民投」係點，囍雨都幾乎肯定班非建制選委會All-In曾俊華，根本佢哋都陸陸續續打晒「開口牌」，話投畀曾俊華，所謂「民投」，都只係一場「扮」畀市民參與嘅遊戲嚟啫！

「民投」是晃子 泛民早決定All-in

當初戴耀廷話希望「民投」有100萬人參與，其實囍雨都相當懷疑，因為經歷過違法佔領行動同埋「累死」自己人嘅雷動計劃，幾多人仲相信戴耀廷大家都心中有數；今次「民投」同預期人數相差成十幾倍，就算唔當佢人數上係失敗，呢個「民投」都冇乜參考價值。點解？一個由戴耀廷佢哋一手發起嘅民間投票，經過「佔中」、立法會選舉，再難相信這種投票有任何中立性或代表性呢！更遑論可代表不同政治光譜市民的意見喇！

退一萬步講，就算「民投」參與人數多啲、代表性大啲，囍雨都唔覺得班非建制派選委會跟住投票。第一，「民投」呢個計支持票淨值嘅方法，點睇都係為薯片曾俊華度身訂造；第二，有非建制選委講到明唔知個「民投」系統會唔會畀黑客入侵而冧檔，如果到頭來結果唔啱心水，戴耀廷佢哋話系統被入侵而無效，市民都吹佢哋唔漲；第三，根據某報章引述嘅消息，有民主派議員講到明，話認為主流民意支持曾俊華，就算冇投票民意都好清晰，即係佢哋基本上都投硬票畀曾俊華。

所以囍雨話，呢個「民投」唔止失敗，直頭係呃人先啱，因為班非建制選委，無論喺「民投」設計上，抑或用唔同說法「閂後門」，基本上都早有決定，充其量係擔心民調結果為佢哋嘅決定而背書，如果認為佢哋係想收集民意，咁就太天真喇！

當初謀殺普選 今借「民意」操弄選舉

最令囍雨憤怒嘅，係戴耀廷同班非建制派聲稱要透過「民投」嚟畀市民一個參與特首選舉嘅機會，但如果當初非建制派唔係一手否決政改方案，今日500萬市民手中已經可以一人一票選特首，又駛乜要靠個虛擬投票嚟表達意見呢？如果班非建制派真係咁重視民意，當年都有唔同調查指有超過半數市民希望通過政改，點解當時佢哋又唔睇民意，一心為反政府而否決普選方案呢？

當日扼殺市民投票選特首機會嘅政客，今日話要畀機會我哋參與特首選舉，真係「神又係你，鬼又係你」！仲有，如果佢哋真係咁痛恨佢哋口中嘅「小圈子」選舉，咁又何必要前仆後繼去選做特首選委，然後扮晒係市民代表呢？其實市民最想嘅，係自己投票，而唔係透過班非建制政客表達意見囉！

圖片來源：rthk