「政治打壓」呢幾個字，近年都真係聽過唔少次，啲人暴力衝擊政府總部畀人控告，出嚟又話係「政治打壓」；有啲人自己喺立法會宣誓嘅時候「玩嘢」違反法例畀政府司法覆核，之後又話係「政治打壓」，真係濫到呢……

近日，之前發起79日「違法佔領」，但到而家仲未找數嗰個港大法律學者戴耀廷，佢同班朋友搞咗個「特首民投」，除咗網上投票，仲會喺三間大學裡面搞實體投票。但好衰唔衰，人哋理工大學寫明唔借場地畀「校外團體」，戴先生冇查清楚，開口埋口就話「政治打壓」，仲惡到要求解釋添。囍雨真心好奇，乜今日香港原來真係打住民主旗號就惡晒，就算自己唔守規矩、法例，都可以調轉頭話番人「政治打壓」架？

理大場地不外借 與「政治打壓」無關

是咁的，戴耀廷等人原定前日喺理工大學設立實體票站，但佢事前冇查清楚場地管理權誰屬，無啦啦走去問理大學生會借場，理大校方見到原來係校外團體，加上學生會又唔認頭喎，梗係企敢唔借出場地啦，好正常啫！

點知一向「惡慣」嘅戴耀廷，當知道冇得喺理大開站後，竟然好似「條件反射」咁話懷疑有人「政治打壓」，仲要求理大解釋云云。大佬呀，試問一間學校嘅場地、房間，剩係借畀自己學校嘅組織或者持份者到底有咩問題？你自己問錯人借場，到底同「政治打壓」又有咩關係先？

仲有呀，根據理大發言人回覆，校方原本對活動都「隻眼開、隻眼閉」，事發前幾日已經表示，會安排足夠人手負責維持秩序同清潔，但理大學生會竟然同校方講，唔會負責為地場開門囉！嘩，想點呀，代校外組織借場已經唔啱規矩，班學生竟然卸膊到連開門鎖都唔肯，搞到個活動好似唔關佢哋事咁，理大想借場畀你都借唔落啦！

理大保留追究戴耀廷權利

呢件事誰是誰非，囍雨認為真係好清楚。戴耀廷身為法律學者，但佢個人是非觀真係非常有問題，明明自己果時搞違法「佔中」，到而家都未承擔罪責呢單都唔計，到而家想借人個場地搞「民投」，違規在先就屈人「打壓」。一係戴耀廷就係有「被害妄想症」，凡有人同佢SAY NO，佢都當人打壓佢；如果唔係，戴耀廷就梗係以為「支持民主就大晒」。呢種人喺今日香港真係愈來愈多，香港靠佢哋爭民主？算把啦！仲有，如果戴耀廷仲有少少羞恥之心，麻煩即刻收回言論，同埋向理大鄭重道歉囉。

圖片來源：大公報