美國NBA宣布，就洛杉磯快艇班主斯特林既種族歧視言論重罰佢，禁止佢以後涉足NBA任何事務，連美國總統奧巴馬都開腔抨擊佢。另一邊廂，巴塞隆拿球星丹尼爾前幾日喺聯賽畀維拉利爾球迷投擲香蕉侮辱，丹尼爾用「食蕉」既方式回應，多個球星喺社交網站貼出「食蕉」相，支持丹尼爾、反對歧視行為。

唔單只喺體育場上，反歧視行為幾乎已經成為世界潮流，發表歧視言論既人，一定會受到千夫所指。不過，偏偏喺香港呢個自詡極之文明同先進城市，歧視竟然係一種潮流，甚至成為網上輿論既主流！係好係醜，囍雨姑且不予置評，大家自己憑良心諗諗。

利申先，面對隨街便溺呢啲不文明同唔衛生既行為，囍雨認為公眾亦唔應該啞忍，要勇敢面對。點為之勇敢面對呀？你當然可以立刻上前破口大罵，但我就會選擇報警或者食環署，搵執法人員嚟處理。正如囍雨同友人去海洋公園玩畀內地旅客插隊，囍雨制止友人同旅客起衝突，但即時請公園職員處理事件，性質完全一樣。

點為之歧視？用地球人既講法，就係「一竹篙打晒一船人」。有內地旅客行為有問題，呢個係事實，但如果因為咁，就向所有內地人發表帶有歧視性既批評，咁就大有問題喇！喂，好基本道理啫，唔使教、唔使講、唔使討論啩？

囍雨自己平時接觸到內地旅客，一定保持禮貌，因為有禮貌唔係尊重其他人咁簡單，仲係對自己既一種尊重。相反如果佢行為極唔文明，我亦會出聲譴責！

唔少香港人追求西方既民主制度，但如果要追求，又點可以唔追求較好既人文精神呢？自由平等，本來就係人人擁有理性反思同道德判斷既能力，每個人都有相同既道德地位，並且受到平等對待。追求民主自由既人，係咪都應該重視尊重、平等呢？咁鍾意學美國嗰套，唔該學埋人哋一有歧視既行為，即刻會被重罰先！唔好學啲唔學啲，唔該晒！

原圖：qiao-you