近日網上最熱爆既討論事件，首推就讀港大醫學院既女生Betty係facebook分享人生經歷。點解該段文章會廣受關注？皆因呢名女生係11年前偷渡來港，多年來一直身懷「行街紙」在港生活。
 
一個「行街紙女孩」憑努力苦讀成功入讀收生標準極嚴格既醫學院，本來係一個好好既勵志故事。點知，女生帖文一出，固然有許多網民叫佢加油，叮囑佢好好把握機會，但「激進反對派」數目亦都唔少，有人以「蝗蟲」直呼呢名小妹妹，有好多人更直接鬧佢「搶資源」，叫佢「滾回大陸」，一句講晒，啲說話真係幾難聽都有。
 
部分網民有咁既反應，無非係因為受到近年被個別媒體瘋狂炒作既兩地矛盾議題所影響，而呢股歪風，近年已近乎有點失控既跡象，唔少以往可以好輕易分得清楚黑白既事件，係呢股歪風下，竟然黑變白，白變黑，你都咪話唔得人驚。
 
「搶資源論」可笑可笑
 
就好似今次事件，呢名女生當年靠偷渡來港當然唔值得大鑼大鼓去鼓勵，但係呢個開端同佢之後既努力，其實就完全係兩回事。有網民鬧爆女生「搶資源」，但囍雨真係打句問句都諗唔明究竟係咩邏輯囉。講真，醫學院收生標準點高法，相信大部分港人都好清楚，依加女生係靠努力靠實力先拎到呢個入讀機會，絕對唔係「先到先得」或「人人有份，派完即止」個類「資源」。即使退一萬步嚟講，假設批評人士既觀點正確，女生唔去「搶」，但究竟全港有幾多人有本事「接收」？正如港大話齋，佢哋係「擇優而取」，成件事根本同女生係邊度出世，係邊度既人無咩關係。
 
據報道，Betty既爸爸係土生土長既香港人，可惜Betty係內地既「超生嬰兒」，係一個「無戶籍」既悲劇人物，所以先至被迫靠偷渡黎香港先至有機會同屋企人團聚。大家完全忽視佢背景就亂鬧入境處同Betty，咁又公唔公平先？
 
努力奮鬥例子竟被屈蝗蟲
 
老土講句，香港人口老化問題就快會殺到，社會上一直探討點樣增加勞動力，囍雨作為香港一分子，都好憎社會上有啲人濫用綜援，又或者嫌遠嫌辛苦懶懶閒唔肯工作，但係好似Betty呢啲展現奮鬥精神既鮮明例子，就算唔拍爛手掌讚揚，橫睇掂睇都無理由屈得就屈話人係蝗蟲啩。
 
Betty成件事被人批評既另一點，係部分人認為佢寫個篇分享文章時顯得有點得意忘形，但對於一個20歲未夠既小妹妹，大家又係唔係有必要就一啲「感覺」施以網絡審判甚至是網絡欺凌？佢係唔係得意忘形，可以話係一個觀點與角度既問題，根本唔應該小題大做或者存心上綱上線去批鬥佢。
 
依加香港社會已經發展到大事小事都被人牽連到兩地矛盾上面，咁樣既情況對於香港呢個廣納人才既地方肯定唔係一件好事。香港由昔日既小漁村變成今日既國際大都會，我哋所依杖既就係打不死既奮鬥精神，以往殖民地時代，香港人係祟洋輕華既社會一樣唔怕競爭，但點解今時今日反而會有部分人開始採取盲目既極端保護主義？
 
香港人，一齊楔高枕頭諗下啦！

原圖：xl7788