國家主席習近平幾日前出訪德國時，喺一個記者會上提到南京大屠殺既歷史事件，表示日軍當年喺南京屠殺咗30萬以上既中國人，中國人對暴行仍然「記憶猶新」；日本官房長官菅義偉就提出抗議，理由係對屠殺中國人既數目同中國有異議。囍雨真係唔明，呢個抗議理由有咩意義？！
 
當囍雨睇到有關新聞之後，睇到菅義偉話當年既屠殺人數介乎2萬至20萬，對中國喺第三國面前提及日本歷史表示遺憾。真真正既令人遺憾既，係菅義偉既回應，有歷史責任，應該做既係承擔、檢討，而絕對唔係迴避，甚至就過錯既程度提出抗議。
 
打個譬如，如果有個小孩偷咗人既錢畀人發現，當畀人斥責既時候，小孩唔係勇於認錯，而係提出抗議，話自己偷既錢無咁多，好難斷定數目，仲話對於有人喺第三個人面對提起自己偷錢表示「遺憾」。呢種抗議既意思，即係話，「我係錯呀，但我無講錯得咁多，錯幾多都斷定唔到，你咁同人講我好遺憾囉」。一個已發展國家，面對以萬計既人命竟然用「無賴」回應抗辯，經濟、社會再發達又如何！
 
就算要計較屠殺既中國人數目，囍雨想問日本「斷定」屠殺人數既意義為何？如果人數斷定後會承認罪責，向死難者家屬道歉、賠償，被屠殺中國人數目就應該更認真看待。如果話未能夠斷定人數只係為咗被譴責時有個「射波位」，日本其實只係想卸責，甚或逃避罪責；雖然日本就二次戰敗賠償，但日本政府有向中國死難者、慰安婦賠償嗎？！答案係無既，請日本唔好再自欺欺人，逃避歷史。
 
菅義偉口口聲聲話日本致力為世界和平做貢獻，實現和平國家既目標，其實要為和平做貢獻，首要條件係要正視國家過去既歷史、現在既狀況，試問一個唔敢照鏡既人，又點會由內到外有自信！識得以史為鑑，國家先有進步，迴避歷史既行為，有失風度都算，視人命如草芥既心態，先係最恐怖。

原圖：網絡