前日政府搞第二場政改早餐會，除咗政務司司長林鄭月娥、律政司司長袁國強同中聯辦法律部部長劉新魁之外，立法會議員亦係重要既主角。誰不知本應係「各自表述、互不引述」既會面，竟然變咗做二次創作大賽，公民黨郭家麒會後「巧京京」咁話，中聯辦會上講「普選無PLAN B，市民唔接受2017方案，就唔知幾時先有普選」，仲話係「少少恐嚇」喎。點知講完無耐，林鄭就行出嚟，踢爆郭醫生「不盡不實」、「演繹主觀」，「瘀爆」既郭醫生唯有認衰補鑊話自己果啲係「個人感覺」。

呢班人一邊抹黑政府同中聯辦，搞到談判雙方冇晒互信，另一邊周圍講中央政府冇誠意落實普選，所以要「佔領中環」，你話目的為咩喇？講穿咗，最唔想有普選咪呢班人囉，不斷耍小動作拉倒普選，居心叵測呀！計我話，政改早餐會其實已經係最普通同最溫和既會面，某啲人唔敢唔出席，費事畀人話唔肯溝通，但又唔可以畀政改成功喎，所以咪搞到劍拔弩張、似打仗多過似談判囉。

唔只係郭醫生係咁架，我相信連《蘋果日報》心態都係咁。就第一場早餐會之嘛，呢份報紙翌日又玩作新聞啦，論調同郭醫生一模一樣，唔通佢哋夾好咗要咁講？揣測啫、揣測啫，我冇「百分百感覺」指控呀，我唔會話自己就係證據架。

講返嗰份報紙，出完篇報道後，即日畀同樣有出席早餐會既公民黨立法會議員湯家驊「篤爆」係失實報道，你話，呢啲係乜居心？搞到大家都唔信中央想搞普選好著數咩？中央喺香港政改有角色架！

大家可以又會話：「唔會既，呢班人爭取民主咁多年，唔會咁衰既！」咁諗就大錯特錯喇，大家唔好唔記得，呢十幾廿年，呢班人都佔據所謂「民主」道德光環，一旦落實普選，香港再冇「民主派」同「建制派」之分，大家知啦，佢哋靠做立法會議員同作新聞攻擊政府食飯嘛，到時咪隨時失業同執笠？真係諗起都心寒呀。