特首梁振英爭取到畀「全體」七十個立法會議員下個去上海，同港澳辦主任王光亞同人大常委會副秘書長李飛會面，直接就政改問題交流。今次訪滬之旅，一如所料唔少泛民主派議員都扭扭擰擰，有啲就話要傾都得，但先要畀回鄉證佢哋、有啲又話中央唔應該有前設。老老實實，要爭取，自然要溝通，唔通喺香港搞咗廿幾年民主運動既民主派，唔係進步到唔駛傾都可以「成功爭取」呀？

唔好誤會，泛民議員扭扭擰擰，唔係話佢哋全部都有問題，查實佢哋當中有唔少既要求都好正路，例如有聲音要求泛民議員分組同中央官員會面，以免有建制派在場變做「嗌交」收場，囍雨就認為合情合理。要辯論、要駁火，喺香港議會內外都有機會啦，根本唔駛去到上海咁鬼遠。

溝通係政改重要第一步

只不過，泛民主派其實亦要顧全大局，中央官員釋出善意同泛民傾政改，泛民班議員若果硬要唔跟《基本法》，咁真係冇得傾落去喎。即係咁，泛民議員要明白，佢哋代表既唔只係所屬既政治團體，仲有廣大市民；明明有交流、爭取機會但放棄，唔單只令自己失去一個表述立場既機會，做法亦都唔符合市民期望。

就算立心拉倒政改，至少都要包含溝通、談判、爭取、拉倒呢啲過程啩？溝通為政治博弈既第一步，泛民如果傾都唔傾，一夠鐘就「佔領中環」，咁對香港似乎冇乜好處喎。

部份議員要求中央官員抱開放態度，唔好帶有前設傾政改，套用同一個道理，如果到訪上海既立法會議員抱住同一態度，咁先至係真正「有商有量」；如果連符合《基本法》呢類基本規定都話唔得，其他嘢仲叫人點同你傾呀？

至於有激進派議員要求去到上海有「行動自由」，囍雨就非常贊成喇，不過唔該佢明白一點，就係自由極都要遵守內地法律，就算係香港「尊貴」既立法會議員，去到內地都唔係你想點就點，到時如果違法畀內地拉咗，唔該就唔好賴死話係「政治打壓」喇，大家都知泛民最興呢味嘢架啦！

原圖：takungpao