公民黨楊岳橋係威係勢，挾住16萬票進入立法會，點知櫈都未坐暖，尋日已經喺立法會審議《版權修訂條例草案》時參加「拉布」，身為大律師，但就係都唔肯聽大律師公會支持通過既意見，口中成日講法治，點知原來都只係門面嘢，去到大是大非前就政治行先，楊岳橋你都真係得架喇！

話說立法會尋日繼續審議即將畀泛民「拉死」既《版權條例》，建制派批評泛民無視大律師公會的意見，點知「新丁」楊岳橋竟然振振有辭咁話喎：「律師所講既當然係就法律本身所作既意見，但今次喺度，喺議事堂所講既係政治，處理既係市民既關心同憂慮。」

講明「玩政治」

開宗明義講到明自己係玩政治，唔係就事請事，投票畀佢嗰16萬個市民，唔通真係覺得咁都叫「理性」？有建制派議員睇唔過眼，隨即就串楊岳橋話：「我哋有位新同事，佢有法律背景。喺佢自己法律上理虧時，就講政治，喺政治上理虧時講法律。」

鬧得真係好，呢啲咪就係政治變色龍之嘛。一時一樣，龍門任你搬，呢個咪就係打住「理性」非暴力旗號既公民黨所為、係標榜「革新」既楊岳橋所為囉。

成個泛民都係咁？

不過咁，其實我哋都唔可以太過「苛責」楊岳橋，點解？因為查實佢班前輩都係同佢差唔多衰囉！唔知大家有冇留意，星期日補選激情過後，其實有三個泛民既疑似人形物體，包括法律界郭榮鏗、資訊科技界莫乃光以及會計界梁繼昌，佢三個竟然主動走出嚟就《版權條例》作溫和修訂，話可以說服到其他泛民接受喎。

講到呢度，唔知大家睇唔睇到問題所在呢？冇錯，遲唔提、早唔提，偏偏補選完先嚟提修訂，唔好畀囍雨批中，梗係怕提修訂會畀網民質疑啦！（唔肯定架，我分析咋！）你班人，明明知道條條例係好既、正既、法律上絕對冇問題，甚至係對香港好既，你哋都因為「選票」兩個字而支持「拉布」，真係有冇搞錯？

今時今日，香港唔少市民就係畀呢種咁既反對派去愚弄，唔再講道理、唔再用自己專業知識去說服群眾，將香港福祉排喺自己政治利益後面，唔通呢啲就係民主？I don’t think so囉！

原圖：takungpao