剛過去既周日，有百幾個網民響旺角進行所謂既「愛國愛黨大遊行」，呢班人打扮成文革時期紅衛兵咁既樣，高舉五星紅旗、手握毛語錄，浩浩蕩蕩咁呼籲內地遊客「愛祖國用國貨」。當然，呢種意味咁突出既諷刺手法，無非係想奚落一下啲內地旅客。
 
囍雨作為香港人，亦都好清楚內地旅客不斷增加帶嚟既好與壞。今次旺角鬧市既諷刺旅客事件，表面上較上次廣東道既滋擾旅客事件嚟得文明，唔少人亦因為咁而聲稱受到感召，好支持佢哋咁話。
 
錯誤趕走豪客　明顯對錯焦
 
撇除行動既手法同出發點既正當性唔講，囍雨認為呢類行動既示威對象其實錯晒焦。試諗下，一直以來對香港民生影響最大既內地客係邊批先？理論上應該係每日多次往返香港同內地、不斷走水貨個批喎，咁同呢幾次事件中主要出入名牌店既內地豪客有乜關係呢？可以得罪講句，依加咁樣搞法，唔係「去蕪存菁」，係「去菁存蕪」，行動有可能趕走咗消費力最強個批豪客，但對水貨客就唔會有影響，咁你話對香港有乜好處？SORRY囉，一毫子好處都冇呀。
 
好老實講，網民之前發起過幾次去上水驅趕水貨客既行動，雖然囍雨都麻麻哋認同呢種手法，但總算係情有可原，始終行動都總算係切中要點，對準目標，但去廣東道同旺角搞事，講真，真係一啲都唔可取，我又唔信尋日旺角示威事件裡面冇其他國家既遊客受影響囉！
 
激進行動　殺錯良民
 
講到底，呢類社會行動，操作上一定要非常小心，皆因好容易「沙塵滾滾，殺錯良民」，就算係之前既「上水站光復」行動，亦曾經出現過示威者錯誤指住個運貨北上既地道香港小商戶嚟鬧兼唔畀佢走既情況啦！
 
都係嗰句，香港雖然係自由社會，但進行乜嘢行動前都要諗下有咩後果同影響。廣東道、旺角鬧市嗰類行動，最終只會趕走豪客，對最影響香港市民日常生活既水貨客乜影響都冇，咁就唔值得做啦。況且，就算真係對準焦點針對水貨客，行動亦唔見得會收效喎，因為水貨客中有六成係「香港人」吖嘛，咁你話搞埋呢啲示威又有乜用呢？

原圖：wenweipo