旺角暴動發生差不多一星期，社會上有關呢次暴動的討論已經大大減少，不過老老實實，囍雨有關呢次暴動既譴責仍然唔足夠，試問發生咁大件事，大家點可以輕輕帶過？囍雨硬頸，對於泛民暴動過後只輕描淡寫「譴責」幾句，之後將暴動責任全部推畀政府既政治決定「十分不齒」。呢啲政客連同理心都冇埋，學乜人從政？

泛民不斷為暴動搵藉口，行為本身就極卑劣，但點衰，都唔及公民黨梁家傑衰。呢位「資深大律師」果然精於捩橫折曲，尋日之嘛，無啦啦老屈政府有意就《基本法》23條立法，呢啲咪煽動囉！

大家不妨先聽聽梁大狀講乜，佢話：「相信很多人都感到很傷心，但梁振英借此事（旺角暴動）作政治鬥爭，來想盡快設立二十三條，我們聽劉兆佳教授說甚麼呢，可能露出狐狸尾巴。」

啊！原來係劉兆佳教授既意見，咁又點呀？關政府咩事？劉兆佳係學者，佢唔可以提出自己意見咩？劉教授而家喺政府都冇官職，點解會入咗政府數？如果係咁，係唔係所有已經退出公民黨既人對外發言，都可以入公民黨數？

眾所周知，「23條」係政治敏感議題，囍雨支持立法，不過今時今日咁既政治氣氛就肯定唔係時候！查實喺梁大狀發表謬論前，保安局局長黎棟國已經重申，政府對「23條」立場冇變，即係現屆政府冇計劃立法。梁大狀係詐唔知，定明屈？大家自己諗。

除咗梁家傑，嗰個青年新政召集人梁頌恆同樣低能無極限，佢話：「當你開槍時，人是求生不是求死，人在該種環境底下會有集體自衛本能，所以令之後的氣氛激化得快。」

呢位較年輕既梁先生，你係唔係冇睇到段電視片？一班暴徒衝埋去襲擊冇防暴裝備既交通警，就算警員已經跌低仍然繼續打，另一位警察為保護同袍，逼不得已向天開槍。大哥，點樣求生又求死呀？咁暴力既場面都只係向天開槍，你班人啲染血磚頭就唔係想人死既？用竹插警察唔係想人死既？縱火唔係想人死既？圍毆警察唔係想人死既？

兩代民主派都滿口歪理，正事唔做、正經事唔講，剩係識得幫暴徒開脫，事事轉移視線，你話我偏激都咁話，投票畀你哋？發夢啦！香港人，大家醒未呀？

原圖：RTHK（梁家傑及梁頌恆）