香港示威者真係愈來愈激，之前有人衝擊軍營，跟住又有「驅蝗」同喺旺角「拖篋」反自由行，廣男近期上討論區睇到有網民喺今個禮拜日發起「愛國愛黨大遊行」，話要用最真誠最真心既愛國情懷教導自由行如何愛國及支持國貨。廣男睇見呢個活動，第一個反應係網民果然有創意，不過講明先，廣男並非否定佢哋既做法，皆因香港始終有遊行自由，我只係想大家都尊重一樣嘢，就係自由行旅客都有購物既自由，仲有，叫人只係買國貨前，唔該全身都係用港貨。
 
自由行「愛國愛黨」就要番內地用國貨，咁廣男真係想問本土派咁「愛香港」，咁大家係唔係都應該只係留港用港貨呢？係全身港產貨喎，先唔講國產貨品，出去參加呢個活動，身上唔該唔好有啲台灣精品呀、日本潮物呀、意大利名牌呀咁喎，如果唔係就畀人話你雙重標準，識話人唔識話自己架喇！
 
廣男呢，係就係覺得呢個活動有「創意」，但就覺得自己唔夠「本土派」既人咁「愛香港」囉，所以就冇資格參加喇。可能同家教有關啦，家人由細到大都教我，自己唔會做、或者根本冇可能做到既野，咁就唔好迫其他人做喇，嗱嗱嗱，廣男冇話參加者冇家教呀，我話自己咋！
 
講返轉頭，雖然今次行動聲稱溫和又唔暴力，至少唔係廣東道式既粗鄙謾罵，但如果參加者活動進行期間，特登走埋啲自由行遊客度瘋狂叫囂，不斷用言語「教導」自由行遊客，呢啲算唔算滋擾呢？廣男見識唔多，希望各位將心比己咁去指教一下。
 
咁當然，如果呢次「愛國愛黨大遊行」只係聚集喺某個地方叫口號同舉示威橫額，咁又真係冇乜所謂既。不過觀乎以往既經驗，呢一類直接同旅客有直接接觸既行動，唔少都會衝突收場，如果最終又發展成為互相謾罵，旅客要走避、商舖要閂門既局面，咁就唔好喇。尤其係到時示威者一定又會被人話「其身不正」、一身外地貨，根本唔夠「愛香港」，咁就無謂啦，Right？

原圖：網絡