社會紛亂不休，有時候囍雨想寫一啲同政治無關既感人故事，亦好似無乜題材可以寫。最近香港樹仁大學既創校校長、中國首位女法官鍾期榮逝世，囍雨一睇番傳媒報導，發現唔少鍾博士多年嚟既好人好事，決定起筆寫一寫佢果種教育家既奉獻精神，發放一下正能量。

做老師、為人父母都知道，身教永遠重要過言教，作為「樹仁之母」，鍾期榮同佢丈夫胡鴻烈本來可以享盡榮華富貴，偏偏將錢財、精力都擺喺樹仁大學，呢種願意奉獻、願意犧牲既精神，並唔係個個教育工作者都得到。

囍雨覺得，教育唔係純粹將知識傳授畀學生咁簡單，能夠改變學生諗法甚至人生，將佢哋導向人生正軌先係好既教育。樹仁既舊生亦話，樹仁並唔係為尖子錦上添花既地方，但一定係一間為唔可以升讀公立大學既學生雪中送炭既學校。

睇番鍾期榮博士喺樹仁既故事，真係覺得佢好人到難以置信，學生無錢交學費，佢貼埋錢畀學生讀書；員工跌銀包，佢畀生活費員工；學校唔夠實習位，佢親自去「叩門」。囍雨喺度諗，如果囍雨當年讀大學既時候有咁值得尊敬既校長，遇起事可以向學校求助，學習起上嚟都會有幹勁啲，學校亦可以做到學生既「Second Home」。

睇番而家社會，唔少香港人總係有林林總總唔同既訴求，但講真，社會其實未必可以樣樣嘢如我哋所願。我哋喺要求既同時，都要明白我地需要奉獻啲乜畀社會。如果每個人都可以為我哋既社會付出多少少、發放多啲正能量，同舟共濟，香港既前路就算艱難，又有乜好怕喎！

原圖：網絡圖片