今朝一早睇到新聞，美國國務院發表年度全球人權報告，話過去一年中國、柬埔寨同越南等地方既人權表現有改善。不過份報告又同時話，「有人」反映香港警方近年採取濫捕、拘留等更具侵略性的策略，目的就係要限制市民集會自由；又有人話，警方對中聯辦外面啲示威活動特別嚴厲。

作為全世界唯一「超級大國」既美國，出一份咁具「權威性」既報告，囍雨梗係要謙虛啲、細心啲睇清楚啦，到底「有人」即係「乜人」，值得美國國務院放入報告呢？睇下香港有咩可以改善都好吖！不過睇真啲，原來所謂「證人」，根本就係舊年元旦遊行中被拒捕既社民連立法會議員梁國雄（長毛）同「人民力量」立法會議員陳偉業（大嚿），佢地聲稱自己被捕係「政治檢控」喎。咁「證據」呢？對唔住，報告冇講，即係「欠奉」。

不過咁，你話份報告好唔公道咩，睇落又唔係。皆因佢批評咗一輪話警方政治打壓後，份報告又補充話，香港都算唔錯，因為香港係「無政治犯」架！

一時話政治打壓、一時又自打嘴巴，話香港「無政治犯」，囍雨真心想問一句，即係點呢？

其實美國國務院自1999年開始，每年都出報告對世界各地的人權情況逐一點評，相信世界上都無邊個國家可以好似美國咁「有心有力」，年復一年搜集資料再撰寫份咁詳細的報告，難怪被稱為「世界人權法官」。不過，今次份報告在資料搜集方面似乎「Hea」咗啲喇，點解？囍雨睇返資料，話元旦遊行當晚，大批示威者在抵達中環後四圍亂走，先後佔據各主要幹道，搞到皇后大道中、花園道及德輔道中交通大癱瘓四、五個鐘，警方多次勸喻無效，最終採取行動，拘捕咗最少7人，當中就包括大嚿同涉嫌違反以《公安條例》中「非法集結」的長毛。

翻查警方近年在示威行動中採取的拘捕行動，都係以《公安條例》中「非法集結」控罪檢控違法人士，雖然最高可判處罰款五千元及監禁三年，但近年判刑例子，除咗長毛被判六十小時社會服務令外，其餘都判罰款、緩刑或守行為。

簡簡單單GOOGLE一下，都可以睇到咁多客觀事實，但堂堂一份權威、莊嚴的世界級報告，卻只因「有人話」，就言之鑿鑿公諸於世人，真係唔睇清楚啲都比你呃咗，美國國務院份報告有幾中肯，已經唔使再多講。

唉，無證無據，好似之前被人炒魷魚的節目主持人，話自己「百分百覺得」言論受打壓，咪又係得個講字。都唔知係因為有人偷懶無做好資料搜集，道聼塗説，定係有心令人有錯覺，「百分百覺得」香港真係咁。

直接將「投訴」當成「事實」，原來唔只香港獨有，連「超級大國」美國都會犯呢啲低級錯誤，話冇政治目的，真係搵鬼信囉！

原圖來源：baxue