民主黨黃碧雲和公民黨毛孟靜，尋晚喺立法會會議後到示威區，期間被激進組織成員包圍同推撞。先唔好理政治立場，囍雨對於暴力行為絕對係深惡痛絕，無論係乜嘢立場既政治人物都好，喺香港都唔應該受到呢種對待，囍雨對有人推撞兩位泛民議員表示強烈譴責！

譴責之餘，囍雨實在好希望泛民主派議員可以好好反省，到底係乜嘢令到呢種粗暴既示威不斷蔓延升級，甚至到咗連泛民議員都可能受到反政府人士攻擊既地步？

縱容暴力惡果浮現

示威者行為愈來愈激，呢個已經係不爭既事實。由當日黃毓民喺立法會會議上面掟出「第一蕉」開始，所謂既「抗爭」就不斷升級，水樽、雞蛋、玩具「屎」……諗到既都有機會拎出嚟掟，議事堂變成馬戲團，同時又冇人敢出聲阻止喎，試問暴力又點會唔蔓延先？

掟嘢都唔係最過份，推推撞撞、肢體衝突近年更加成為反政府人士既「家常便飯」！唔少香港人，好似囍雨咁，每逢睇到呢啲畫面個心都好唔舒服，每次都忍唔住問：「點解香港會變成咁？」

當然，出現上述情況理由有好多，政府亦唔係一啲責任都冇，但如果最初發生呢啲暴力事件時，泛民主派議員可以理直氣壯咁去「譴責、遏止、切割」呢啲暴行，而唔係用「曖昧、縱容、視而不見」既態度去應對，呢種風氣相信亦唔會蔓延得咁快。

你可以話囍雨事後孔明，但肯定既係，如果泛民議員唔係一直對「暴力」曖曖昧昧既話，年輕一代絕對唔會好似今日咁，只係聽到一方面既聲音，甚至以為激進派議員所講所做就係主流或者真理！

違法思潮令人憂慮

剃人頭者，人亦剃其頭也。當初以為暴力只係對政府有影響，「事不關己、己不勞心」，示威者今日又點會愈來愈失控，又愈來愈自以為是吖！

就好似舊年嗰一場歷時七十九日既「雨傘暴動」咁，呢場可能係香港史上最多人參與既違法行為，喺社會上的確產生咗極度負面既影響 – 好肯定，愈來愈人以為，只要合乎「自己心目中既公義」，就可以隨便違法、隨便用暴力。呢種想法，喺年輕一代之間不斷流傳，遺害之大，從近一年發生既種種暴力衝擊事件已經可以見到端倪。

泛民議員呀，火已經燒到埋身，你哋已經唔可以詐唔知，或者覺得唔關自己事。係唔係仲要對暴力行為投鼠忌器，唔敢直斥其非？希望你哋好好反省，之後正正式式畀個答案市民啦。

原圖：巴士的報