工黨李卓人同社民連「長毛」梁國雄，上年畀人揭發接受傳媒大亨黎智英秘密捐款，結果畀立法會專責委員會調查。雖然證據確鑿，但委員會竟然判定對兩人既投訴唔成立，聽到消息，囍雨內心不禁高呼：「唔係呀化？」

兩個議員，不約而同用「代所屬政黨收捐款」為由去解釋「袋住先」呢個荒謬既行為；哈，偏偏委員會裡面既泛民議員又接納喎，真係諗極都唔明！

好，先講講點解囍雨覺得呢單嘢肯定有問題先。第一，係最簡單既理由：「袋住先」唔申報，本身已經犯錯，就當兩位議員真係幫個黨去袋，但唔申報都係有問題架喎！點解泛民議員覺得佢兩個「清白」呢？

第二，李卓人同長毛「袋住先」，其中平日一副正氣凜然咁樣既李卓人更加袋住當中五十萬超過八個月，之後喺傳媒踢爆下先將錢轉返落工黨戶口。五十萬喎、八個月喎！咁都可以講到係冇事呀？

李卓人狡辯話，五十萬一直喺戶口，郁都冇郁過。首先要問一句，佢戶口原本有冇錢？佢存入五十萬後，個戶口又係唔係完全冇提過款？如果有提過款，咁點「證明」李卓人拎出嚟既唔係黎智英畀你嗰五十萬，而係你自己既錢？你解吖，公眾等解釋架。

第三，委員會裡面有三位泛民議員，其中郭榮鏗同劉慧卿所屬政黨都已證實有收受黎智英捐款。委員會今次調查既，正正係同公民黨、民主黨「金主」相關既問題，咁都叫冇利益衝突？你兩個仲好意思投票話李卓人同梁國雄兩個冇問題？唔係呀化？

第四，傳媒大亨捐款畀政黨，本身其實已經有問題。壹傳媒係咩立場，大家都知，黎智英自己有錢，想點用冇人可以管，但偏偏佢盤生意係「傳媒」，咁就唔同講法喇。好簡單問一句，泛民有行動，或者泛民議員既一言一行，壹傳媒係唔係唔報道先？答案梗係「唔係」啦，咁你一手捐錢畀個政黨運作，另一手又採訪佢哋活動，咁同「自製新聞」有咩分別？靠製造新聞「影響香港政局」喎！咁都當冇事？

老老實實，呢單嘢誰是誰非其實已經非常清楚，只不過李卓人同長毛兩個要厚顏無恥死撐落去，市民都冇佢哋辦法。算啦，囍雨都睇化晒，泛民一向都係「待人以嚴、待己以寬」架啦，咁勞氣又做乜吖。

原圖：bastillepost,wenweipo,takungpao