又係「熱狗」（熱血公民）！到底呢班人想點？

講緊係熱血公民一班成員，佢哋尋日浩浩蕩蕩十幾二十人不請自來，拉大隊去香港版權大聯盟召開記者會搗亂，最終搞到人哋開唔成記者會，唔可以成功將佢哋對《2014版權（修訂）條例草案》既意見，透過親愛既傳媒傳遞畀香港市民知。咦，乜呢班人唔係成日將「自由、民主、人權、法治」放口邊架咩？做乜咁野蠻，打壓其他人言論自由架？

老老實實，社會對《2014版權（修訂）條例草案》又不同意見，積極發表意見同討論唔緊要，但大前提係唔可以唔畀人講囉。香港版權大聯盟支持通過法例，認為通過咗對版權既保障好得多，佢哋唔係冇道理架喎；正如香港好多網民都會顧住自己利益，唔想既有權利被收窄，人同此心啫。

不過，偏偏「熱狗」能人所不能，諗嘢方法亦都異於常人。佢哋尋日以所謂「傳媒」身份，係都要入記者會「採訪」，就算人哋已經落逐客令都唔肯走，咁無賴都有，真係世間少有。

講真，莫講話你唔係正式媒體吖，就退一萬步當你真係「媒體」，人哋唔畀你入你都冇權入採訪架喎，乜「新聞自由」可以壓倒私人產權架咩？SORRY呀，真係聞所未聞囉！仲有，正如香港版權大聯盟發言人所講，乜「採訪」要十幾廿人咁多架咩？仲要著晒一式一樣既「制服」，個別「記者」仲戴埋面罩添，大佬，咪玩啦！

嗰個帶頭搞事既「熱狗」仲好笑，竟然大剌剌當住記者反問全香港市民：「私人地方冇邀請就唔入得，咁你哋接唔接受吖！我想問！如果係你，會唔會用盡方法，去得到佢哋答覆呢？」

上述歪理有幾歪，真係講多都費事。如果私人地方冇邀請都入得，咁麻煩尋日帶頭搞事嗰位「熱狗」成員，率先開放晒自己屋企畀人參觀、入住、過夜同娛樂先。嗱嗱嗱，唔準又搬龍門架，唔可以閂埋度門唔畀人入架。你做得到，我畀個「叻」你，否則唔該唔好同人講上述嗰番「歪理」，拜託！

所以話啫，「自由、民主、人權、法治」？撈選票啫，講呢啲！

原圖：wenweipo