仲記得半年前，政改方案表決前夕，西貢搗破咗個炸彈工廠，好多人心頭一震，發現極端暴力手段已經殺到埋身。點知到噚日，正值版權修訂條例審議嘅敏感時刻，立法會大樓示威區一個垃圾桶就被縱火，之後仲發生爆炸，心頭一震已經變成驚天一爆。响暴力襲擊陰霾籠罩全球嘅今日，你同我仲可以唔擔心？

議事堂內外暴力升級有跡可尋

○八年十月，暴力祖師黃毓民响立法會向時任特首曾蔭權掟蕉開始，立法會已經陷入無窮無盡既暴力歲月。議事堂入面，以黃毓民、梁國雄呢啲人為首嘅激進派，粗暴程度同次數都有增無減。掟蕉之外，仲有雞蛋、饅頭、道具、水樽......掟極都未遠。舊年七月，黃毓民仲曾經向住特首梁振英位處既方向掟玻璃杯，碎片即使飛到周圍都係。

議事堂出面又點呢？一年半前嘅反對新界東北前期撥款示威，幾百個示威者响六個激進組織煽動兼個別立法會做「內應」下進攻立法會，多名保安因而受傷，現場滿目瘡痍。事後證明，呢次事件只係立法會外暴力嘅開端，去到九月尾，「雨傘暴動」爆發，立法會外面成段路被暴力佔領，示威區變成私家地，其他人想正常請願？無可能囉。到咗十一月某一晚，最少百幾個激進示威者仲借啲意發難突襲立法會，部分人戴上口罩用鐵馬同執起磚頭衝擊立法會外嘅玻璃門，仲打穿立法會外牆同玻璃！

有啲人以為，玻璃門都爛咗，應該知衰收手？咪傻啦，就响今年六月政改方案表決前無幾耐，警方竟然破獲震驚全城嘅「炸彈案」，探員趁住目標人士响西貢蠔涌疑進行引爆測試時拉人，檢獲嘅兩公升液態化學品可以用嚟製作高爆炸性物TATP。據講，當時其中一個可能目標正正係立法會大樓。以為暴徒會收斂，點知暴力仲未同廣大港人講拜拜，噚晚既爆炸案，真真正正驚醒咗人心。

議員可齊心一致對抗惡勢力嗎？

依加諗返，黃毓民兩年前對住政務司司長林鄭月娥話「唔係掟你雞蛋，就掟你汽油彈」果番凶神惡煞嘅言論，佢本人或許真係「靠嚇」，但佢班信徒同其他激進示威者就唔係「靠嚇」咁簡單喇！今次，立法會示威區發生嘅爆炸，正正係懷疑有人刻意焚燒一個小型石油氣罐再將佢丟响垃圾桶引發。議事堂內外嘅暴力升級其實早有就跡可尋，炸立法會，已經唔再係靠嚇嘞！

暴力，响任何時候都係眾人嘅公敵，囍雨希望唔同黨派嘅議員今次真係可以拋開分歧，攜手帶領市民齊聲對抗呢種惡勢力，守住我哋嘅議事堂、守住一向和平嘅香港呀！

原圖：TMHK短片截圖/bastillepost.com