BEYOND既黃家強以表演嘉賓身份日前出席經民聯晚宴，期間同問責官員合唱，同埋同特首梁振英合照，結果惹嚟激進網民臭罵。見到呢啲不公不義既情況，囍雨又忍唔住要爆發：「你班人鬧乜嘢？以為咁樣就可以令到政府眾叛親離？其實咁只係凸顯你班人窮途末路、心虛咋！」

囍雨真心想知，乜大家真係覺得呢啲咁既欺凌可以令到理性既藝人同歌手退縮咩？唔會囉。點解？因為你哋只係識得匿喺網絡世界，對住個網就以為係全世界，配合埋某啲偏頗傳媒煽風點火，就以為呢個世界你話事！買碟？咪玩囉，會買碟就唔會咁驚《2014年版權（修訂）條例》啦！

再舉個例，早排傳出聖保羅男女中學邀請特首做典禮嘉賓，一班聲稱代表校友既人走出嚟，話有成千人反對。結果，特首咪照樣去主禮，現場一個示威既人都冇！點解？因為你班人剩係識匿喺電腦後面做「戰士」囉，因為你哋心底知道，自己唔係「主流」囉！

囍雨明白既，呢班「雨傘暴動」既支持者騎劫咗BEYOND首《海闊天空》做飲歌，見到BEYOND成員同特首一齊唱，一定不是味兒，所以咪要走出嚟網上欺凌偶像囉。但講真，乜黃家強有「背棄了理想」咩？冇呀，反而係你班「雨傘暴動」支持者唔再認傘民先好笑。

呢呢呢，就啱啱過去既區議會選舉之嘛，有理所謂「傘兵」勝出，但原來全部唔敢打正「雨傘暴動」旗號，靜靜雞去選，呃晒啲議席返嚟。你班人有打出、敢打出「雨傘暴動」牌咩？冇呀，多謝晒！即係你班人都知，「雨傘暴動」係毒藥，已經賣唔出啦！

一班井底之蛙，以為靠恐嚇同語言暴力就可以令人「收聲」，呢種諗法真係好傻好天真。人哋作為歌手，表演就要盡力去唱，做好本份咁先叫專業。唔通要歌手因為政治立場「推JOB」？我係歌手，我因為政治立場推泛民JOB又得唔得？所以話呢，最雙重標準就係你班咁既激進網民。

以為大聲夾惡就可以整死人，嘿，認真好笑。唔該得閒向向北望，睇清楚個市場喺邊度，係內地呀。你班人想喺香港整死唔同立場既歌手？乜咁鍾意玩政治逼害呀？但害人唔死先好笑吖嘛！

BY THE WAY，其實你班人知唔知道內地電視台係可以聽到《海闊天空》架？BEYOND其他成員喺浙江衛視都唱過架。唔知？咪就係「井底之蛙」囉。

原圖：黃家強的音樂力量facebook專頁