特首梁振英喺北京同中央領導人述職，事前有風聲話中央會規範化述職工作，對內容會有要求，並唔係特首想講乜就講乜。港澳辦主任王光亞今朝亦證實呢個講法，講明除咗報告成果外，亦要講出有乜不足。中央對述職有要求正常不過，偏偏有人要用陰謀論「分析」件事，話因為梁振英以往述職時「瞞上欺下」，中央失去信心，所以需要規範化述職內容喎。聽到呢種講法，我當堂嚇一跳，之後得啖笑。

坦白講，唔通中央領導人要等特首述職先可以了解到香港發生緊乜事咩？主流媒體成日都話啦，內地「收風人」成日嚟香港吖嘛，加上香港裡面仲有個駐港機構，中央政府點可能唔知香港發生緊乜事？又點會唔知邊班人搞亂緊香港？既然對香港情況瞭若指掌，又何需刻意為咗防止梁振英「瞞上欺下」而規範化特首述職呢？

其實只要諗真啲、頭腦清晰啲，就會知道嗰啲陰謀論其實幾好笑。

咁點解王光亞要講到明，特首述職除咗要講成績，亦要講有乜不足，以及未來一年既計劃呢？其實好簡單，前中央政策組首席顧問劉兆佳話，規範述職內容，目的係要為「特首向中央政府負責」呢一項工作建立明確又完整既制度。大家唔好唔記得，如果一切順利，2017年香港就可以有第一個普選出嚟既特首，為咗迎接普選，除咗特區政府之外，中央亦要建立一套制度加以配合，你估普選特首真係一人一票選特首咁Simple咩！

今時今日，好多所謂評論都刻意事件簡單化同低智化，政治立場決定一切，而所謂既「分析」，很多都係唔知邊度收返嚟既「風」，講穿咗就係用嚟攻擊政敵，令市民覺得中央唔再支持特區政府，從而製造恐慌。囍雨唔知有幾多人會受到呢啲傳言影響，我只係想講，人哋劉兆佳有名有姓有地位唔去信，偏偏去信埋啲傳言，如果呢啲就係反政府人士既質素，我會覺得好可悲囉！

原圖：新華社