到咗今日仍然講掟蛋，坦白講，我都覺得自己OUT OUT哋，不過雖然遲咗，但道理總應該講清楚。社民連成員因為掟蛋擊財爺而被捕，佢事後仲親自撰文，嘗試合理化自己既行為，其中一個論點，係批評政府施政諸多不是，好似每年好多長者輪候安老院床位時過身、好多年輕人冇得讀大學、香港冇退休保障，同埋香港人唔想來屆特首選舉有任何不公平篩選等等。即使上述理由全部都正確，咁又代唔代表掟蛋就係合理呢？

今屆政府上場後係唔係真係乜都冇做過，大家心裡有數。長者安老床位唔夠，係因為土地供應不足，今屆政府努力搵地，但反政府人士就批評佢「盲搶地」、香港冇退休保障，政府其實已經邀請咗港大周永新教授研究，明年就會有初步方案，至於特首選舉唔想有篩選，而家唔係諮詢緊咩？傾都唔傾、諗都唔諗政府做緊乜就掟蛋，唔通咁就好合理？

再講，即使動機幾合理都好，掟蛋，講到天腳底都係一種暴力。大家或者有所不知，雞蛋如果用嚟掟的話，撞擊力可能遠超一個壁球，更危險既係，掟蛋出去之時，蛋殼盡碎，啲碎片就會順住衝擊力不規則飛散，一旦插咗入眼就會好似刀割咁犀利！

掟蛋者成日話，掟蛋喺外國係家常便飯，象徵住「無權者向當權者既高牆作良知呼喊」。SORRY呀，就算掟蛋喺外國好常見，亦唔見得香港人要模仿，更唔代表呢個行為係「啱」！

借問一聲，唔通人人做就叫做「啱」、人人去做你就要跟住做？夠喇，香港人聽夠歪理喇，你選擇用呢種方式發洩，悉隨尊便，但唔好將自己既抗爭行為美化！將自己講到好英雄咁，但當律政司真係告你又話人政治檢控喎，撫心自問，咁樣就係公義咩？

退一萬步講，即使呢個政府真係「暴」，掟蛋都係「以暴易暴」，即係行私刑，請問掟蛋者，係唔係想香港人人擅用私刑，視制度同法治如無物先安樂？你唔滿意香港政制，要搞流血革命的話，請講清講楚，唔好閃閃縮縮，又要扮英雄，又巧言令色話掟蛋唔係暴力，咁只係證明你虛怯咋！