喺呢個價值觀扭曲同歪理亂舞既年代，唔少人已經分唔清黑同白，眼中只有鬥爭，完全冇是非觀念可言。財政司司長曾俊華上星期六同特首一齊出席公眾論壇，期間畀雞蛋掟中，事後有人批評，特首譴責示威者「冇政治器量」，又認為應該留返畀曾俊華自己決定追唔追究件事咁話。計我話，發表呢啲評論既人真真正正係捩橫折曲、邏輯混亂，而且對人唔對事，令人非常失望！

有一點必須講清楚，即使特首回應真係唔好，亦唔代表掟雞蛋就「合法」同「合理」。特首作為政府首長，唔係即時出嚟叫停，唔通就任由暴力事件變本加厲？呢類暴力示威未來只會不斷升級，就好似今日立法會咁，已經有議員話要掟「汽油彈」啦！

大家將心比己，如果你係曾俊華，自己畀人暴力襲擊後，上司竟然走出嚟話「掟得好呀，歡迎大家繼續吖！」，請問你會點諗？仲有，啲人成日話特首「語言偽術」，嘿，今次特首直截了當譴責暴力，大家又取笑佢冇技巧囉，咁到底大家想點呀？

仲有呀，話應該留返畀曾俊華自己決定追唔追究嗰啲，到底知唔知自己講乜？如果告唔告、追唔追究可以係曾俊華「說了算」，咁咪即係「人治」囉！喂，呢單刑事案嚟架，告唔告係律政司決定架，原來大家想高官可以干預檢控架？

好，退一萬步講，就算特首回應真係差，但都唔代表特首「譴責」係「錯」，更加就唔代表掟蛋既人行為係「啱」。部份傳媒翌日只係話特首答得唔「得體」，但對掟蛋班人行為就輕輕帶過，完全「失焦」同「誤導」。為求達到政治目的，即使顛倒是非黑白都在所不計，原來呢啲就係「公義」？

香港愈來愈光怪陸離，傳媒同反政府人士為求達到政治目的，刻意將暴力美化，唔去譴責掟雞蛋者，反而集中去講特首回應得好唔好。掟完雞蛋嗰班又死不認錯，仲夠膽死反咬特首「冇幽默感似暴君」，呢啲指鹿為馬既歪理，如果真係今日香港既寫照，我只可以講，絕對係香港人既悲哀。

原圖：無綫新聞截圖