過咗新年，香港依然熱鬧處處，講緊嘅係本港賞花熱點。近年賞花成為香港人熱門嘅春季活動，趁住春天啱啱嚟到，快啲計劃吓周末去邊度賞花好。

賞乜花：櫻花
以前香港人想睇櫻花，點都要搭程飛機，而家香港有多處賞櫻好地方，長洲關公亭、嘉道理農場都係港人賞櫻首選，每年開花期都迫滿人潮。如果唔介意櫻花開得比較疏落，人流較少嘅中大新亞書院同大帽山扶輪公園係另一個選擇，由於櫻花樹樹齡較小，生長得唔高，反而更容易同櫻花合照。

賞乜花：全港最大花海
大埔海濱公園係全港最大嘅公園，園內除咗有大埔地標香港回歸塔之外，塔旁嘅花海會因應季節種植唔同嘅鮮花，例如雀尾花、矮牽牛、萬壽菊、鳳尾球等，花色鮮艷繽紛，每年都吸引好多愛花人士。

另外，海濱公園有草地供市民野餐、放風箏，園內嘅自然教育徑同昆蟲屋適合小朋友學習生態知識，所以海濱公園唔單只適合睇花，亦適合一家大細進行親子活動！

賞乜花：四季時花、溫室植物
要數全港最接近市區嘅賞花地點，一定會有香港公園同香港動植物公園。本港唯二由康文署管豁嘅溫室都位於兩個公園之內，市民除咗可以觀賞園內種植嘅外來及本地花卉品種，亦可以喺溫室搵到香港少見嘅熱帶同沙漠植物，以及多種食蟲植物。

提提大家，大家都想捕捉花朵最美嘅角度留影，但賞花同拍攝同時除咗要注意安全，亦要愛護植物，唔好折斷或踐踏植物，將美麗景觀留俾下一位賞花人士。

圖：網絡