好多人都鐘意過年時買年花放喺屋企或者公司舖頭，桃花、大桔、銀柳、水仙…花多眼亂都唔知點揀好？睇吓各款年花嘅寓意，新年想趨旺乜嘢就買乜嘢番去啦！

大桔 –「柑桔」「金吉」，取其有金又有吉。做生意買盤金沙桔，代表生意「大吉大利」；柑桔連葉寓意姻緣「開花結果」。但有人話年桔只可以送俾自己人，因為將年桔送俾外人就好似將好運氣送出去咁喎。

桃花 – 桃花被喻為旺財又旺人緣，「紅桃」與「鴻圖」同音，做生意嘅鐘意擺棵桃花希望「大展鴻圖」；桃花又寓意吉祥，可以趨旺人緣桃花運，所以無論單身或已婚嘅人都鐘意過年時買桃花。

水仙 – 水仙香氣清新，過年擺水仙寓意新一年幸福快樂，充滿生機。

銀柳 – 寓意「有銀又有樓」，銀柳本身只有白色，市面上七彩繽紛嘅銀柳都係後期上色，不過無論係咩顏色嘅銀柳都係近年嘅年花新寵。

桃花

劍蘭 – 向上開花係劍蘭嘅生長特性，有「步步高昇」嘅意思。

五代同堂 – 名稱已代表一切，祈求家宅平安，個個身體健康。

富貴竹 – 取其「富貴豐足」之意，屋企人要準備升職考試，亦可以放盤富貴竹提升吓文昌運和事業運。

牡丹 – 過年喺屋企擺一盤「花中之王」，希望新一年大富大貴。

菊花 – 民間一般認為菊花代表富貴，風水學亦指菊花可以招財，加上菊花顏色喜氣，花期又長，象徵「長久豐足」。

資料來源：綜合網絡

圖：cbnweek.com