在昨日的反水貨客示威中，有一家三口拖着行李篋途徑現場時，即不由分說遭到激進示威者口出惡言辱罵，同行的女童在疑受驚嚇下更放聲大哭，事件引發各界關注。不過，消閒雜誌創辦人《100毛》林日曦今早在facebook卻發表極其涼薄的言論，直指「細路仔喊，其實真係平常到不得了」，又聲言「我對嗰位細路喊，真係冇乜感覺，只係覺得有啲嘈」。林日曦此番話顯然有偷換概念之嫌，完全無視辱罵事件的暴力性質。

以下為林日曦facebook帖文全文：

「噚日『遊覽全港』其中一個焦點，係有示威者『搞喊』咗個細路，事件引發各方討論。我想話，有同情心係好，但切忌讓同情心蓋過其他一切事情。細路仔喊，其實真係平常到不得了。我喺餐廳會聽到細路仔喊，我喺巴士會聽到細路仔喊，甚至，我喺睇戲途中，都無數次畀細路仔喊聲嘈爆過。喊，真係好稀奇嚴重？

將注意力放返喺呢幾次遊覽行動。唔好再講有冇細路仔喊，只以百幾人的力量，已惹來港府回應、大陸輿論，係非常犀利。我等市民唔洗出手，就有人幫你遊覽埋，我自己就真係冇乜嘢好投訴。

我住過粉嶺，見證住水客佔領上水；之後搬咗去元朗，睇住水客填滿大馬路；然後搬埋去屯門，一直陪住班大陸人買貴嘢食貴嘢交貴租。我係好自私，喺呢一刻，我只會同情冒住被捕、畀差佬打嘅風險而依然走上最前線嘅市民，我對嗰位細路喊，真係冇乜感覺，只係覺得有啲嘈。」

原圖：林日曦facebook截圖