浸會大學早前發生學生「佔領」語言中心事件，期間更有學生以粗口辱罵教師，引起各界嘩然，浸大校長錢大康其後向師生和舊生發信，斥學生行為不負責任，校方會嚴肅處理。受盡各界責難的浸會大學學生會昨晚發表了超過八百字「澄清」，反過來質疑傳媒報導引起多個誤解，但全份聲明卻以「口語字」寫成，頗不莊重。他們指「佔領」語文中心並非單純基於普通話豁免試難度高且合格率低，也因為出題方式及協議不符、評分準則不透明、欠缺完整上訴機制、遲遲未計劃取消普通話畢業要求等因素。學生會續稱，無意要求校方取消所有普通話課程，但不認同將普通話能力列作畢業要求。 不過，縱觀全份聲明，學生會未提及會否向被辱罵的老師道歉，也未提及會長「爆粗」一事。 以下為學生會聲明全文： 就佔領語文中心之澄清 由於近日傳媒廣泛報導本會喺本月十七號（星期三）嘅佔領語文中心行動，當中涉及唔少誤解，特此作出五點澄清： （一） 根據檢討大學語言政策專責小組嘅決定，普通話豁免試原意為測試同學嘅普通話基本溝通能力，但最後唔少同學儘管被考官評價表達流暢，亦因各種離奇原因而唔合格，如「語氣不符角色設定」；（二） 本會帶領同學佔領語文中心，並非單純基於普通話豁免試難度高且合格率低，而係基於出題方式同協議不符、評分準則唔透明、欠缺完整上訴機制、遲遲未計劃取消普通話畢業要求等因素；（三） 錢大康校長嘅群發電郵指出，校方樂於解答同學疑問，本會無法苟同——事實上，語文中心嘅主任喺同學提出要求後超過五個鐘，先肯將評分準則公開，且談判期間多次以「冇其他準則」、「三個部分比重一樣」等錯誤講法，企圖誤導同學對實際評分標準嘅理解；（四） 就普通話畢業要求，本會以至其他基本會員已經循唔同渠道，向校方表達訴求，包括體制外嘅公開論壇、全民投票、公開信、體制內嘅教務議會等，但以上行動都無法動搖普通話畢業要求，本會因而以佔領語文中心希望得到合理回應；（五） 本會尊重所有希望修讀普通話課程嘅同學，亦無意要求校方取消所有普通話課程；普通話對浸大同學修讀其他課程無必然幫助，亦唔係唯一可以修讀嘅外語，本會唔認同作為一間立足香港嘅大學，需要將普通話能力列作畢業要求。 希望各位會員清楚明白事件背景。另外，喺談判過後，校方承諾舉辦一次公開會議，就豁免試同普通話畢業要求進行檢討，希望同學參與，詳情如下： 日期：二零一八年一月二十三號（星期二）時間：下晝一點至四點地點：善衡校園方樹泉圖書館FSC 501（鏡房）語言：廣東話，輔以英語及普通話 校方一直以嚟只係話，豁免試會考核同學嘅普通話基本溝通能力，最後竟公然違背當初對同學嘅承諾，是為失信。明知豁免試內容制訂倉猝，評分毫無透明公開可言，仍然推出畀同學去考核，是為失職。本會僅此希望校方負上校方應負嘅責任，正視普通話畢業要求嘅流弊，正面回應同學一直以嚟嘅訴求。 香港浸會大學學生會二零一八年一月二十一號 原圖：hkbu.edu